September 2014

Abhi is taraf na nigah kar main ghazal ki palken sanwar lun | Bashir Badr

Abhi is taraf na nigah kar main ghazal ki palken sanwar lun
Mera lafz lafz ho aaina tujhe aaine men utar lun

main tamam din ka thaka hua tu tamam shab ka jaga hua
zara Thahar ja isi moD par tere sath sham guzar lun

agar aasman ki numaishon men mujhe bhi izn-e-qayam ho
to main motiyon ki dukan se teri baaliyan tere haar lun

kahin aur banT de shahr men kahin aur baKHsh de izzaten
mere pas hai mera aaina main kabhi na gard-o-ghubar lun

ashaar mere yun to zamane ke liye hain

ashaar mere yun to zamane ke liye hain
kuchh sher faqat un ko sunane ke liye hain

ab ye bhi nahin Thik ki har dard miTa den
kuchh dard kaleje se lagane ke liye hain

aankhon men jo bhar loge to kanTon se chubhenge
ye KHwab to palkon pe sajaane ke liye hain

dekhun tere hathon ko to lagta hai tere hath
mandir men faqat dip jalane ke liye hain

ye ilm ka sauda ye risale ye kitaben
ek shaKHs ki yaadon ko bhulane ke liye hain

baat karni mujhe mushkil kabhi aisi to na thi

baat karni mujhe mushkil kabhi aisi to na thi
jaisi ab hai teri mahfil kabhi aisi to na thi

le gaya chhin ke kaun aaj tera sabr o qarar
be-qarari tujhe ai dil kabhi aisi to na thi

uski aankhon ne KHuda jaane kiya kya jadu
ki tabiat meri mail kabhi aisi to na thi

aks-e-ruKHsar ne kis ke hai tujhe chamkaya
tab tujh men mah-e-kaamil kabhi aisi to na thi

ab ki jo rah-e-mohabbat men uThai taklif
saKHt hoti hamen manzil kabhi aisi to na thi

pa-e-kuban koi zindan men naya hai majnun
aati aawaz-e-salasil kabhi aisi to na thi

chalne ka hausla nahin rukna muhaal kar diya | Parveen Shakir

chalne ka hausla nahin rukna muhaal kar diya
ishq ke is safar ne to mujhko niDhaal kar diya

ai meri gul-zamin tujhe chaah thi ek kitab ki
ahl-e-kitab ne magar kya tera haal kar diya

milte hue dilon ke beech aur tha faisla koi
usne magar bichhaDte waqt aur sawal kar diya

ab ke hawa ke sath hai daman-e-yar muntazir
banu-e-shab ke hath men rakhna sambhaal kar diya

mumkina faislon men ek hijr ka faisla bhi tha
humne to ek baat ki usne kamal kar diya

DhunDoge agar mulkon mulkon milne ke nahin nayab hain hum

DhunDoge agar mulkon mulkon milne ke nahin nayab hain hum
jo yaad na aae bhul ke phir ai ham-nafaso wo KHwab hain hum

main hairat o hasrat ka mara KHamosh khaDa hun sahil par
dariya-e-mohabbat kahta hai aa kuchh bhi nahin payab hain hum

ho jae bakheDa pak kahin pas apne bula len behtar hai
ab dard-e-judai se unki ai aah bahut betab hain hum

ai shauq bura is wahm ka ho maktub tamam apna na hua
wan chehre pe un ke KHat nikla yan bhule hue alqab hain hum

dil hi to hai na Sang-o-KHisht dard se bhar na aae kyun

dil hi to hai na Sang-o-KHisht dard se bhar na aae kyun
roenge hum hazar bar koi hamen satae kyun

dair nahin haram nahin dar nahin aastan nahin
baiThe hain rahguzar pe hum ghair hamen uThae kyun

jab wo jamal-e-dil-faroz surat-e-mehr-e-nim-roz
aap hi ho nazzara-soz parde men munh chhupae kyun

dashna-e-ghamza jaan-satan nawak-e-naz be-panah
tera hi aks-e-ruKH sahi samne tere aae kyun

qaid-e-hayat o band-e-gham asl men donon ek hain
maut se pahle aadmi gham se najat pae kyun

duniya ke sitam yaad na apni hi wafa yaad | Jigar Moradabadi

duniya ke sitam yaad na apni hi wafa yaad
ab mujhko nahin kuchh bhi mohabbat ke siwa yaad

main shikwa ba-lab tha mujhe ye bhi na raha yaad
shayad ki mere bhulne wale ne kiya yaad

chheDa tha jise pahle-pahal teri nazar ne
ab tak hai wo ek naghma-e-be-saz-o-sada yaad

jab koi hasin hota hai sargarm-e-nawazish
us waqt wo kuchh aur bhi aate hain siwa yaad

kya jaaniye kya ho gaya arbab-e-junun ko
marne ki ada yaad na jine ki ada yaad

muddat hui ek hadsa-e-ishq ko lekin
ab tak hai tere dil ke dhaDakne ki sada yaad

ek pal men ek sadi ka maza humse puchhiye

ek pal men ek sadi ka maza humse puchhiye
do din ki zindagi ka maza humse puchhiye

bhule hain rafta rafta unhen muddaton men hum
qiston men KHud-kushi ka maza humse puchhiye

aaghaz-e-ashiqi ka maza aap jaaniye
anjam-e-ashiqi ka maza humse puchhiye

jalte diyon men jalte gharon jaisi zau kahan
sarkar raushni ka maza humse puchhiye

wo jaan hi gae ki hamen un se pyar hai
aankhon ki muKHbiri ka maza humse puchhiye

hansne ka shauq hum ko bhi tha aap ki tarah
hansiye magar hansi ka maza humse puchhiye

jhuki jhuki si nazar be-qarar hai ki nahin

jhuki jhuki si nazar be-qarar hai ki nahin
daba daba sa sahi dil men pyar hai ki nahin

tu apne dil ki jawan dhaDkanon ko gin ke bata
meri tarah tera dil be-qarar hai ki nahin

wo pal ki jis men mohabbat jawan hoti hai
us ek pal ka tujhe intizar hai ki nahin

tujhe bhi apne pe ye etibar hai ki nahin
teri umid pe Thukra raha hun duniya ko

Wohi taaj hai wohi takht hai wohi zahr hai wohi jaam hai

Wohi taaj hai wohi takht hai wohi zahr hai wohi jaam hai
Ye wohi khuda ki zameen hai ye wohi buton ka nizaam hai

Bade shauq se mera ghar jala koi aanch tujh pe na aayegi
Ye zaban kisi ne khareed li, ye qalam kisi ka ghulam hai

Yahan eik bachche key khoon se jo likha hua hai use padhein
Tera keertan abhi paap hai abhi mera sajda haraam hai

Main ye manta hun mere diye teri aandhiyon ne bujha diye
Magar eik jugnu hawaon mein abhi roshni ka imaam hai

ye samundar hai kinare hi kinare jao

ye samundar hai kinare hi kinare jao
ishq har shaKHs ke bas ka nahin pyare jao

yun to maqtal men tamashai bahut aate hain
aao us waqt ki jis waqt pukare jao

dil ki bazi lage phir jaan ki bazi lag jae
ishq men haar ke baiTho nahin haare jao

kaam ban jae agar zulf-e-junun ban jae
is liye usko sanwaro ki sanware jao

koi rasta koi manzil ise dushwar nahin
jis jagah chaho mohabbat ke sahaare jao

hum to miTTi se ugaenge mohabbat ke gulab
tum agar toDne jate ho sitare jao