December 2014

Aaj ke daur men aiy dost ye manzar kyuN hai

Aaj ke daur men aiy dost ye manzar kyuN hai
zaKhm har sar pe har ik haath men patthar kyuN hai

jab haqiqat hai ke har zarre men tu rahtaa hai
phir zamin par kahin masjid kahin mandir kyuN hai

apnaa anjaam to maalum hai sab ko phir bhi
apani nazaron men har insaan sikandar kyuN hai

zindagi jine ke qaabil hi nahin ab "Faakir"
varnaa har aaNkh men ashkon kaa samandar kyuN hai

By : Sudarshan Faakir

tum itnaa jo muskuraa rahe ho

tum itnaa jo muskuraa rahe ho
kya Gham hai jis ko chhupaha rahe ho

aaNkhon men nami haNsi labon par
kya haal hai kya dikhaa rahe ho

ban jaayenge zahar pite pite
ye ashk jo pite jaa rahe ho

jin zaKhmon ko waqt bhar chalaa hai
tum kyon unhen chheDe jaa rahe ho

rekhaaon kaa khel hai muqaddar
rekhaaon se maat khaa rahe ho