August 2016

Zulmat-e-shab ko sitaaron se sanwaara hum ne,

Zulmat-e-shab ko sitaaron se sanwaara hum ne,
Kitni raton ko tujhe uth ke pukara hum ne,

Jab kabhi hath se umeed ka daaman choota,
Le liya aap ke daaman ka sahara hum ne,

Yoon to dunya bhi mukhaalif hai hamari warna,
Rukh badaltey huye dekha hai tumhara hum ne,

Hum zamaney se bhi takraa gaye teri khaatir,
Jo na karna tha kiya woh bhi ganwaara hum ne,

Ae Taqi, Gham nahin yeh jaan rahe ya na rahe,
Paa liya un nighaaon ka ishaara hum ne..

phir mujhe didaa-e-tar yaad aya

phir mujhe didaa-e-tar yaad aya
dil jigar tashnaa-e-fariyaad aya

dam liyaa tha na qayaamat ne hanoz
phir teraa vaqt-e-safar yaad aya

saadgi haaye tamanna yaani
phir wo nai_rang-e-nazar yaad aya

uzr-e-vaamaa.Ndagii ae hasrat-e-dil
nala kartaa tha jigar yaad aya

zindagi yuN bhi guzar hi jaati
kyo.n teraa raah_guzar yaad aya

kyaa hi rizavaan se laDai hogi
ghar teraa Khuld me.n gar yaad aya

aah wo jurrat-e-fariyaad kahaaN
dil se tang aake jigar yaad aya

Pattaa Pattaa booTa booTa haal hamara jaane hai

pattaa-pattaa booTa booTa haal hamara jaane hai
jaane na jaane gul hi na jaane, baaGh to saara jaane hai

lagne na de bas ho to us ke gauhar-e-gosh ke baale tak
us ko falak chashm-e-mai-o-Khor ki titli kaa taara jaane hai

aage us mutaqabbar ke ham Khuda Khuda kiyaa karte hain
kab maujuud Khudaa ko vo maGhroor Khud-aara jaane hai

aashiq saa to saadaa koi aur na hoga duniyaa men
jii ke ziaan ko ishq men us ke apanaa vaaraa jaane hai

saare jahaaN se achhaa hindustaan hamara

saare jahaa.N se achhaa hindustaan hamaaraa
ham bulbule.n hai.n is ki ye gulistaa.N hamaaraa

Ghurbat me.n ho.n agar ham rahtaa hai dil vatan me.n
samajho vahi.n hamein bhi dil ho jahaa.N hamaaraa

parvat wo sab se uuNchaa ham_saayaa aasmaa.N kaa
wo santari hamaaraa wo paasabaa.N hamaaraa

godi me.n khelti hai.n is ki hazaaro.n nadiyaa.N
gulshan hai jin ke dam se rashk-e-janaa.N hamaaraa

ai aab-e-ruud-e-gangaa wo din hai yaad tujh ko
utraa tere kinaare jab kaarawaa.N hamaaraa