Jaan Nisar Akhtar

ashaar mere yun to zamane ke liye hain
kuchh sher faqat un ko sunane ke liye hain

ab ye bhi nahin Thik ki har dard miTa den
kuchh dard kaleje se lagane ke liye hain

aankhon men jo bhar loge to kanTon se chubhenge
ye KHwab to palkon pe sajaane ke liye hain

dekhun tere hathon ko to lagta hai tere hath
mandir men faqat dip jalane ke liye hain

ye ilm ka sauda ye risale ye kitaben
ek shaKHs ki yaadon ko bhulane ke liye hain