نہیں عشق میں اس کا تو رنج ہمیں کہ قرار و شکیب ذرا نہ رہا
غم عشق تو اپنا رفیق رہا کوئی اور بلا سے رہا نہ رہا
دیا اپنی خودی کو جو ہم نے اٹھا وہ جو پردہ سا بیچ میں تھا نہ رہا
رہے پردے میں اب نہ وہ پردہ نشیں کوئی دوسرا اس کے سوا نہ رہا
نہ تھی حال کی جب ہمیں خبر رہے دیکھتے اوروں کے عیب و ہنر
پڑی اپنی برائیوں پر جو نظر تو نگاہ میں کوئی برا نہ رہا
ترے رخ کے خیال میں کون سے دن اٹھے مجھ پہ نہ فتنۂ روز جزا
تری زلف کے دھیان میں کون سی شب مرے سر پہ ہجوم بلا نہ رہا
ہمیں ساغر بادہ کے دینے میں اب کرے دیر جو ساقی تو ہائے غضب
کہ یہ عہد نشاط یہ دور طرب نہ رہے گا جہاں میں سدا نہ رہا
کئی روز میں آج وہ مہر لقا ہوا میرے جو سامنے جلوہ نما
مجھے صبر و قرار ذرا نہ رہا اسے پاس حجاب و حیا نہ رہا
ترے خنجر و تیغ کی آب رواں ہوئی جب کہ سبیل ستم زدگاں
گئے کتنے ہی قافلے خشک زباں کوئی تشنۂ آب بقا نہ رہا
مجھے صاف بتائے نگار اگر تو یہ پوچھوں میں رو رو کے خون جگر
ملے پاؤں سے کس کے ہیں دیدۂ تر کف پا پہ جو رنگ حنا نہ رہا
اسے چاہا تھا میں نے کہ روک رکھوں مری جان بھی جائے تو جانے نہ دوں
کئے لاکھ فریب کروڑ فسوں نہ رہا نہ رہا نہ رہا نہ رہا
لگے یوں تو ہزاروں ہی تیر ستم کہ تڑپتے رہے پڑے خاک پہ ہم
ولے ناز و کرشمہ کی تیغ دو دم لگی ایسی کہ تسمہ لگا نہ رہا
ظفرؔ آدمی اس کو نہ جانئے گا وہ ہو کیسا ہی صاحب فہم و ذکا
جسے عیش میں یاد خدا نہ رہی جسے طیش میں خوف خدا نہ رہا
nahin ishq mein is ka to ranj hamen ki qarar o shakeb zara na raha
gham-e-ishq to apna rafiq raha koi aur bala se raha na raha
diya apni khudi ko jo ham ne utha wo jo parda sa bich mein tha na raha
rahe parde mein ab na wo parda-nashin koi dusra us ke siva na raha
na thi haal ki jab hamen khabar rahe dekhte auron ke aib o hunar
padi apni buraiyon par jo nazar to nigah mein koi bura na raha
tire rukh ke khayal mein kaun se din uthe mujh pe na fitna-e-roz-e-jaza
tiri zulf ke dhyan mein kaun si shab mire sar pe hujum-e-bala na raha
hamen saghar-e-bada ke dene mein ab kare der jo saqi to hae ghazab
ki ye ahd-e-nashat ye daur-e-tarab na rahega jahan mein sada na raha
kai roz mein aaj wo mehr-liqa hua mere jo samne jalva-numa
mujhe sabr o qarar zara na raha use pas-e-hijab-o-haya na raha
tire khanjar o tegh ki ab-e-rawan hui jab ki sabil-e-sitam-zadgan
gae kitne hi qafile khushk-zaban koi tishna-e-ab-e-baqa na raha
mujhe saf batae nigar agar to ye puchhun main ro ro ke khun-e-jigar
male panv se kis ke hain dida-e-tar kaf-e-pa pe jo rang-e-hina na raha
use chaha tha main ne ki rok rakhun miri jaan bhi jaae to jaane na dun
kiye lakh fareb karod fusun na raha na raha na raha na raha
lage yun hi hazaron hi tir-e-sitam ki tadapte rahe pade khak pe ham
wale naz o karishma ki tegh-e-do-dam lagi aisi ki tasma laga na raha
'zafar' aadmi us ko na janiyega wo ho kaisa hi sahab-e-fahm-o-zaka
jise aish mein yad-e-khuda na rahi jise taish mein khauf-e-khuda na raha
