Welcome To Urdu Shayari

ye aur baat hai tujh se gila nahin karte 
jo zakhm tu ne diye hain bhara nahin karte 

hazar jaal liye ghumti phire duniya 
tire asiir kisi ke hua nahin karte 

ye ainon ki tarah dekh-bhal chahte hain 
ki dil bhi TuTen to phir se juDa nahin karte 

vafa ki aanch sukhan ka tapak do in ko 
dilon ke chaak rafu se sila nahin karte 

jahan ho pyaar ġhalat-fahmiyan bhi hoti hain 
so baat baat pe yuun dil bura nahin karte 

hamen hamari anaen tabah kar dengi 
mukalme ka agar silsila nahin karte 

jo ham pe guzri hai janan vo tum pe bhi guzre 
jo dil bhi chahe to aisi dua nahin karte 

har ik dua ke muqaddar men kab huzuri hai 
tamam ghunche to 'amjad' khila nahin karte 

sarakti jaa.e hai rukh se naqab ahista ahista 
nikalta aa raha hai aftab ahista ahista 

javan hone lage jab vo to ham se kar liya parda 
haya yak-lakht aa.i aur shabab ahista ahista 

shab-e-furqat ka jaaga huun farishto ab to sone do 
kabhi fursat men kar lena hisab ahista ahista 

saval-e-vasl par un ko adu ka khauf hai itna 
dabe honTon se dete hain javab ahista ahista 

vo bedardi se sar kaTen 'amir' aur main kahun un se 
huzur ahista ahista janab ahista ahista 

UnhiN ko raah e talab khaar daar di gayi hai

Woh jin ko mamlekat e aetebaar di gayi hai

Zara si der to solein yeh ahl e dil K inhein

Bahut taveel shab e intezaar di gayi hai

Gaye dinoN meN hamara tha Qasr e khush aasaar

Ab apne naam ki takhti utaar di gayi hai

Lahoo lahaan ujaaloN ka din dhalaa aakhir

Siyaah, karb-zada shab guzaar di gayi hai

Hamaare paas tha kya khaab, woh to toot gaya

Ek aur cheez thi jaaN, tujh per waar di gayi hai

Hamaari dasht navardi ko ek fasaane mein

Bashaarat e shajar e saaya daar di gayi hai

Bas ek khyaal hai taskeen E jaaN hamare liye
Zamane bhar se koi bad gumaaN hamare liye

Jo tera lams mile to khule yeh baab E wajood
Aur is mein ho tu kabhi mayhmaaN hamare liye

Hum us pe khaab ki soorat utarne waale hain
Sajaye aaNkh mein wo kahkashaaN hamare liye

Udaas hochuke lamhoN mein rang bharti hui
Hawaaye shaam hai na-mehrbaaN hamare liye

Nateejatan hamaiN mahroom e khaab hona paRa
HaqeeqatoN ne kaRe imtehaaN hamare liye

Udaas rut mein  basad ehtemaam  aagaye hain
In aaNsuoN ko  saleeqay tamaam aagaye hain

Agar  na laut ke aayeN  to yeh  samajh lenaa
K hum bhi jung-e-muhabbat mein kaam aagaye hain

Pukaarti hai hamain  saahiloN se aati hawaa
K likh ke ret pe, teraa jo naam aagaye hain

Ajeeb rog laga hum ko sair E mahfil ka
So maikaday ki taraf ek shaam aagaye hain

Bus ek hum hain sabhi darja-bandiyoN se paray
Wagarna bazm mein sab khaas o aam aagaye hain

Bahte daryaa meN utar jana tha
Khaak the aur bikhar jana tha

Us se bichhRe to zamaanaa beeta
Ab talak zakhm ko bhar jana tha

Maan letaa huN tujhe hi manzil!!
Ab kahaaN yaad kidhar jana tha

Hausle ham ne bachakar rak_khe
Jab hameN had se guzar jana tha

Jaan !!! is hijr pe ronaa kaisa!!!
Ek din yuN bhi to mar jana tha

Raz E ulfat chhupa ke dekh liya
Dil bahut kuchh jala ke dekh liya

Aur kya dekhne ko baaqi hai
Aap se dil lagaa ke dekh liya

Wo mere ho ke bhi mere na hue
Unko apnaa bana ke dekh liya

Aj unki nazar meN kuchh hamne
Sabki nazreN bachaa ke dekh liya

Aas us dar se TuTti hi nahiN
Ja k dekha, na ja ke dekh liya

Faiz takmil E Gham bhi ho na saki
Ishq ko aazmaa ke dekh liya