Welcome To Urdu Shayari

Muhajir hain magar hum ek duniya chhor aaye hain,
Tumhare paas jitna hai hum utna chhor aaye hain.

Kahani ka ye hissa aaj tak sab se chhupaya hai,
Ke hum mitti ki khaatir apna sona chhor aaye hain.

Nayi duniya basa lene ki ik kamzor chahat mein,
Purane ghar ki dehleezon ko soona chhor aaye hain.

Aqeedat se kalai par jo ik bachchi ne baandhi thi,
Wo rakhi chhor aaye hain, wo rishta chhor aaye hain.

Kisi ki aarzu ke paon mein zanjeer daali thi,
Kisi ki oon ki teeli mein phanda chhor aaye hain.

Paka kar rotiyan rakhti thi maan jisme saleeqe se,
Nikalte waqt wo roti ki daliya chhor aaye hain.

Jo ik patli sadak Unnao se Mohan jaati hai,
Wahin hasrat ke khwabon ko bhatkata chhor aaye hain.

Yaqeen aata nahin, lagta hai kacchi neend mein shayad,
Hum apna ghar gali apna mohallah chhor aaye hain.

Hamare laut aane ki duaein karta rehta hai,
Hum apni chhat pe jo chidiyon ka jathha chhor aaye hain.

Hamein hijrat ki is andhi gufa mein yaad aata hai,
Ajanta chhor aaye hain, Ellora chhor aaye hain.

Sabhi tyohar miljul kar manate the wahan jab the,
Diwali chhor aaye hain, Dussehra chhor aaye hain.

Hamein suraj ki kirnen is liye takleef deti hain,
Awadh ki shaam, Kashi ka savera chhor aaye hain.

Gale milti hui nadiyan, gale milte hue mazhab,
Allahabad mein kaisa nazara chhor aaye hain.

Hum apne saath tasveeren to le aaye hain shaadi ki,
Kisi shayar ne likkha tha jo sehra chhor aaye hain.

Kai aankhen abhi tak ye shikayat karti rehti hain,
Ke hum behte hue kajal ka dariya chhor aaye hain.

Shakar is jism se khilwaad karna kaise chhodega,
Ke hum jamun ke pedon ko akela chhor aaye hain.

Wo bargad jiske pedon se mehak aati thi phoolon ki,
Ussi bargad mein ek haryal ka joda chhor aaye hain.

Abhi tak barison mein bheegte hi yaad aata hai,
Ke chappar ke neeche apna chhata chhor aaye hain.

Bhateeji ab saleeqe se dupatta odhti hogi,
Wahi jhoole mein hum jisko humadta chhor aaye hain.

Ye hijrat to nahin thi, buzdili shayad hamari thi,
Ke hum bistar mein ek haddi ka dhancha chhor aaye hain.

Hamari ahliya to aa gayi, maan chhut gayi aakhir,
Ke hum peetal uthaa laaye hain, sona chhor aaye hain.

Mahino tak to Ammi khwab mein bhi budbudati thin,
Sukhaane ke liye chhat par pudina chhor aaye hain.

Wizarat bhi hamare waaste kam martaba hogi,
Hum apni maan ke haathon mein nivaala chhor aaye hain.

Yahan aate hue har qeemti samaan le aaye,
Magar Iqbal ka likha tarana chhor aaye hain.

Himalaya se nikalti har nadi awaaz deti thi,
Miyaan aao wuzu kar lo — ye jumla chhor aaye hain.

Wuzu karne ko jab bhi baithte hain yaad aata hai,
Ke hum jaldi mein Jamuna ka kinara chhor aaye hain.

Utaar aaye murawwat aur rawadaari ka har chola,
Jo ek sadhu ne pehnayi thi maala chhor aaye hain.

Janab-e-Mir ka Deewan to hum saath le aaye,
Magar hum Mir ke maathe ka kashka chhor aaye hain.

Udhar ka koi mil jaaye idhar to hum yehi poochhein,
Hum aankhen chhor aaye hain ke chashma chhor aaye hain.

Hamari rishtedari to nahin thi haan talluq tha,
Jo Lakshmi chhor aaye hain jo Durga chhor aaye hain.

Gale milti hui nadiyan, gale milte hue mazhab,
Allahabad mein kaisa nazaara chhor aaye hain.

Kal ek amrood wale se ye kehna gaya humko,
Jahan se aaye hain hum, iski bagiya chhor aaye hain.

Wo hairat se hume takta raha, kuch der phir bola,
Wo Sangam ka ilaaka chhut gaya ya chhor aaye hain?

Abhi hum soch mein ghum the ke usse kya kaha jaaye,
Hamare aansuon ne raaz khola — chhor aaye hain.

Muharram mein hamara Lucknow Iran lagta tha,
Madad Maula! Husainabad rota chhor aaye hain.

Jo ek patli sadak Unnao se Mohan jaati hai,
Wahin hasrat ke khwabon ko bhatkata chhor aaye hain.

Mahal se door bargad ke tale mawaan ke khaatir,
Thake haare hue Gautam ko baitha chhor aaye hain.

Tasalli ko koi kaaghaz bhi chipka nahin paaye,
Charagh-e-dil ka sheesha yun hi chatkha chhor aaye hain.

Sadak bhi Sher-Shahi aa gayi taqseem ke zad mein,
Tujhe karke Hindustan chhota chhor aaye hain.

Hansi aati hai apni adakaari par khud humko,
Bane firte hain Yusuf aur Zulekha chhor aaye hain.

Guzarte waqt bazaaron mein ab bhi yaad aata hai,
Kisi ko uske kamre mein sanwarta chhor aaye hain.

Hamara raasta takte hue pathra gayi hongi,
Wo aankhen jinko hum khidki pe rakha chhor aaye hain.

Tu humse chaand itni berukhi se baat karta hai,
Hum apni jheel mein ek chaand utara chhor aaye hain.

Ye do kamron ka ghar aur ye sulagti zindagi apni,
Wahan itna bada naukar ka kamra chhor aaye hain.

Hume marne se pehle sabko ye takeed karna hai,
Kisi ko mat bata dena ke kya-kya chhor aaye hain.

Jis des se maon bahno ko aghyar utha kar le jayen
Jis des ke qatil ghundon ko ashraf chuda kar le jayen

Jis des ki kot kachahri me insaf takon par bikta ho
Jis des ka munshi qazi bhi mujrim se puch kar likhta ho

Jis des ke chappe chappe par plice ke nake hote hon
Jis des ke mandir masjid me har roz dhamake hote hon

Jis des me jan ke rakhwale khud jane len masumon ke
Jis des me hakim zalim ho siski na sune majbooron ki

Jis des ki galiyon kuchon me har simt fahashi phaili ho
Jis des me bint-e-hawwa ki chadar bhi dagh se maili ho

Jis des me ate chini ka bohran falak tak ja pahunche
Jis des me bijli pani ka fuqdan halaq tak A pahunche

Jis des ke har chorahe par do char bhikari phirte hon
Jis des me roz jahazon se imdadi thaili girte hon

Jis des me ghurbat maon se bache neelam krati ho
Jis des me daulat shorfa se najayez kam krati ho

Jis des ke aohdedaron se aohde na sambhale jate hon
Jis des ke sada lauh insan wadon pe hi tale jate hon

Us des ke har ek leader par sawal uthana wajib hai
Us des ke har ek hakim ko sooli pe chadhana wajib hai

tumhen dil-lagi bhuul jaani paḌegi mohabbat ki rahon men aa kar to dekho
taḌapne pe mere na phir tum hansoge kabhi dil kisi se laga kar to dekho

vafaon ki ham se tavaqqo nahin hai magar ek baar aazma kar to dekho
zamane ko apna bana kar to dekha hamen bhi tum apna bana kar to dekho

ḳhuda ke liye chhoḌ do ab ye parda ki hain aaj ham tum nahin ġhair koi
shab-e-vasl bhi hai hijab is qadar kyon zara ruḳh se anchal uTha kar to dekho

jafa.en bahut kiin bahut zulm Dhaa.e kabhi ik nigah-e-karam is taraf bhi
hamesha hue dekh kar mujh ko barham kisi din zara muskura kar to dekho

jo ulfat men har ik sitam hai gavara ye sab kuchh hai pas-e-vafa tum se varna
satate ho din-rat jis tarah mujh ko kisi ġhair ko yuun sata kar to dekho

agarche kisi baat par vo ḳhafa hain to achchha yahi hai tum apni si kar lo
vo manen na manen ye marzi hai un ki magar un ko 'purnam' mana kar to dekho

Woh raste tark karta hoon, woh manzil chhod deta hoon,
Jahaan izzat nahin milti, woh mehfil chhod deta hoon.

Kināron se agar meri khudi ko thens pahunchhe to,
Bhanwar mein doob jaata hoon, main saahil chhod deta hoon.

Mujhe maange hue saaye hamesha dhoop lagte hain,
Main sooraj ke gale padta hoon, baadal chhod deta hoon.

Talluq yun nahin rakhta, kabhi rakha kabhi chhoda,
Jise main chhodta hoon phir mukammal chhod deta hoon.

Hindi Script

वह रास्ते तर्क करता हूँ, वह मंज़िल छोड़ देता हूँ,
जहाँ इज़्ज़त नहीं मिलती, वह महफ़िल छोड़ देता हूँ।

किनारों से अगर मेरी ख़ुदी को ठेस पहुँचे तो,
भँवर में डूब जाता हूँ, मैं साहिल छोड़ देता हूँ।

मुझे माँगे हुए साए हमेशा धूप लगते हैं,
मैं सूरज के गले पड़ता हूँ, बादल छोड़ देता हूँ।

तअल्लुक़ यूँ नहीं रखता, कभी रखा कभी छोड़ा,
जिसे मैं छोड़ता हूँ, फिर मुकम्मल छोड़ देता हूँ।

sitaron se aage jahan aur bhi hain
abhi ishq ke imtihan aur bhi hain

tahi zindagi se nahin ye faza.en
yahan saikḌon karvan aur bhi hain

qana.at na kar alam-e-rang-o-bu par
chaman aur bhi ashiyan aur bhi hain

agar kho gaya ik nasheman to kya ġham
maqamat-e-ah-o-fuġhan aur bhi hain

tu shahin hai parvaz hai kaam tera
tire samne asman aur bhi hain

isi roz o shab men ulajh kar na rah ja
ki tere zaman o makan aur bhi hain

ga.e din ki tanha tha main anjuman men
yahan ab mire raz-dan aur bhi hain

uTTho miri duniya ke gharibon ko jaga do
kaḳh-e-umra ke dar o divar hila do

garmao ghulamon ka lahu soz-e-yaqin se
kunjishk-e-faromaya ko shahin se laḌa do

sulatani-e-jamhur ka aata hai zamana
jo naqsh-e-kuhan tum ko nazar aae miTa do

jis khet se dahqan ko mayassar nahin rozi
us khet ke har ḳhosha-e-gandum ko jala do

kyuun ḳhaliq o maḳhluq men haail rahen parde
piran-e-kalisa ko kalisa se uTha do

haq ra ba-sajude sanaman ra ba-tavafe
behtar hai charagh-e-haram-o-dair bujha do

main na-ḳhush o be-zar huun marmar ki silon se
mere liye miTTi ka haram aur bana do

tahzib-e-navi kargah-e-shishagaran hai
adab-e-junun shair-e-mashriq ko sikha do

zulm phir zulm hai baḌhta hai to miT jaata hai
ḳhuun phir ḳhuun hai Tapkega to jam ja.ega

ḳhak-e-sahra pe jame ya kaf-e-qatil pe jame
farq-e-insaf pe ya pa-e-salasil pe jame

teġh-e-be-dad pe ya lasha-e-bismil pe jame
ḳhuun phir ḳhuun hai Tapkega to jam ja.ega

laakh baiThe koi chhup-chhup ke kamin-gahon men
ḳhuun ḳhud deta hai jalladon ke maskan ka suraġh

sazishen laakh uḌati rahin zulmat ki naqab
le ke har buund nikalti hai hatheli pe charaġh

zulm ki qismat-e-nakara-o-rusva se kaho
jabr ki hikmat-e-parkar ke iima se kaho

mahmil-e-majlis-e-aqvam ki laila se kaho
ḳhuun divana hai daman pe lapak sakta hai

sho.ala-e-tund hai ḳhirman pe lapak sakta hai
tum ne jis ḳhuun ko maqtal men dabana chaha

aaj vo kucha o bazar men aa nikla hai
kahin sho.ala kahin na.ara kahin patthar ban kar

ḳhuun chalta hai to rukta nahin sanginon se
sar uThata hai to dabta nahin a.inon se

zulm ki baat hi kya zulm ki auqat hi kya
zulm bas zulm hai aġhaz se anjam talak

ḳhuun phir ḳhuun hai sau shakl badal sakta hai
aisi shaklen ki miTao to miTa.e na bane

aaise sho.ale ki bujhao to bujha.e na bane
aaise na.are ki dabao to daba.e na bane