Mirza Ghalib

phir mujhe didaa-e-tar yaad aya
dil jigar tashnaa-e-fariyaad aya

dam liyaa tha na qayaamat ne hanoz
phir teraa vaqt-e-safar yaad aya

saadgi haaye tamanna yaani
phir wo nai_rang-e-nazar yaad aya

uzr-e-vaamaa.Ndagii ae hasrat-e-dil
nala kartaa tha jigar yaad aya

zindagi yuN bhi guzar hi jaati
kyo.n teraa raah_guzar yaad aya

kyaa hi rizavaan se laDai hogi
ghar teraa Khuld me.n gar yaad aya

aah wo jurrat-e-fariyaad kahaaN
dil se tang aake jigar yaad aya

phir tere kuche ko jaata hai Khayaal
dil-e-Gum_gashtaa magar yaad aya

koi viraani-si-viraa.Ni hai
dasht ko dekh ke ghar yaad aya

main ne majnuN pe laDakpan men 'Asad'
sang uThaya tha ke sar yaad aya

dil hi to hai na Sang-o-KHisht dard se bhar na aae kyun
roenge hum hazar bar koi hamen satae kyun

dair nahin haram nahin dar nahin aastan nahin
baiThe hain rahguzar pe hum ghair hamen uThae kyun

jab wo jamal-e-dil-faroz surat-e-mehr-e-nim-roz
aap hi ho nazzara-soz parde men munh chhupae kyun

dashna-e-ghamza jaan-satan nawak-e-naz be-panah
tera hi aks-e-ruKH sahi samne tere aae kyun

qaid-e-hayat o band-e-gham asl men donon ek hain
maut se pahle aadmi gham se najat pae kyun

husn aur us pe husn-e-zan rah gai bul-hawas ki sharm
apne pe etimad hai ghair ko aazmae kyun

wan wo ghurur-e-izz-o-naz yan ye hijab-e-pas-e-waza
rah men hum milen kahan bazm men wo bulae kyun

han wo nahin KHuda-parast jao wo bewafa sahi
jis ko ho din-O-dil aziz uski gali men jaae kyun

ghaalib-e-KHasta ke baghair kaun se kaam band hain
roiye zaar zaar kya kijiye haae haae kyun

ishq mujh ko nahi.n wahshat hi sahi
meri wahshat teri shohrat hi sahi

qat.a kijiye na ta.Alluq ham se
kuchh nahi.n hai to adaawat hi sahi

mere hone me.n hai kyaa ruswaai
ai wo majlis nahi.n KHalvat hi sahi

ham bhi dushman to nahin hain apne
Ghair ko tujh se mohabbat hi sahi

apni hasti hi se ho jo kuchh ho
aagahi gar nahi.n Ghaflat hi sahi

umr har-chand ki hai barq-e-KHiraam
dil ke KHun karne ki fursat hi sahi

ham koi tark-e-wafaa karte hain
na sahi ishq musibat hi sahi

kuchh to de ai falak-e-naa-insaaf
aah o fariyaad ki ruKHsat hi sahii

ham bhi taslim ki KHu Daale.nge
be-niyaazii teri aadat hi sahi

yaar se chhe.D chali jaa.e asad
gar nahi.n vasl to hasrat hi sahi

aina kyu na dun k tamasha kahe jise
aisa kahan se laun k tujhsa kahe jise

hasrat ne la rakha teri bazm-e-khayal mein
guldasta-e-nigah suweda kahe jise

phunka hai kisne goshe muhabbat mein ai Khuda
afsun-e-intazar tamanna kahe jise

sar par hujum-e-dard-e-garibi se daliye
wo ek musht-e-khak k sahra kahe jise

hai chashm-e-tar mein hasrat-e-didar se nihan
shauq-e-inan gusekhta dariya kahe jise

darkar hai shiguftan-e-gul haye aish ko
subh-e-bahar panba-e-mina kahe jise

“ghalib” bura na man jo waiz bura kahe
aisa bhi koi hai k sab acha kahe jise

 

sadgi par us ke mar jane ke hasrat dil mein hai
bas nahi chalta ki phir khanjar kaf-e-qatil mein hai

dekhana taqarir ke lazzat ki jo usane kaha
mainne yah jana ki goya yah bhi mere dil mein hai

garche hai kis kis burai se wale ba in hama
zikr mera mujh se behtar hai ki us mahafil mein hai

bas hujum-e-na umidi khak mein mil jayagi
yah jo ik lazzat hamari sai-e-behasil mein hai

ranj-e-rah kyon khenchiye vamandagi ko ishq hai
uth nahi sakta hamara jo qadam manzil mein hai

jalva zar-e-atash-e-dozakh hamara dil sahi
fitana-e-shor-e-qayamat kis ke aab-o-gil mein hai

hai dil-e-shorida-e-galib tilism-e-pech-o-tab
raham kar apni tamanna par ki kis mushkil mein hai

baazeechaa-e-atfaal hai duniya mere aage
hota hai shab-o-roz tamaasha mere aage

ik khel hai auraNg-e-sulemaaN mere nazdeek
ik baat hai 'eijaz-e-maseeha mere aage

juz naam naheeN soorat-e-aalam mujhe manzoor
juz waham naheeN hastee-e-ashiya mere aage

hota hai nihaaN gard meiN sehara mere hote
ghisata hai jabeeN KHaak pe dariya mere aage

mat pooch ke kya haal hai mera tere peeche ?
too dekh ke kya rang tera mere aage

sach kahte ho, KHudbeen-o-KHud_aaraa na kyoN hooN ?
baiTha hai but-e-aainaa_seemaa mere aage

fir dekhiye andaaz-e-gul_afshaani-e-guftaar
rakh de koee paimaanaa-o-sahba mere aage

nafrat ka gumaaN guzare hai, maiN rashk se guzaraa
kyoN kar kahooN, lo naam na uska mere aage

imaaN mujhe roke hai jo khiNche hai mujhe kufr
ka'aba mere peeche hai kaleesa mere aage

aashiq hooN, pe maashooq_farebee hai mera kaam
majnooN ko bura kehti hai laila mere aage

KHush hote haiN par wasl meiN yoN mar naheeN jaate
aayee shab-e-hijaraaN ki tamanna mere aage

hai mauj_zan ik qulzum-e-KHooN, kaash, yahee ho
aata hai abhee dekhiye kya-kya mere aage

go haath ko jumbish naheeN aaNhoN meiN to dam hai
rehne do abhee saaGHar-o-meena mere aage

ham_pesha-o-ham_masharb-o-ham_raaz hai mera
'GHalib' ko bura kyoN kaho achchaa mere aage !

 Mirza Ghalib

koee din gar zindagaanee aur hai
apne jee meiN hamne THaanee aur hai

aatish-e-dozaKH meiN ye garmee kahaaN
soz-e-GHam haay nihaanee aur hai

baarha dekhee haiN unkee ranjishaiN
par kuchch ab ke sar_giraanee aur hai

deke KHat muNh dekhta hai naamabar
kuchch to paiGHaam-e-zabaanee aur hai

qaata-e-'amaar hai aksar nujoom
woh balaa-e-aasmaanee aur hai

ho chukeeN 'GHalib' balaayeN sab tamaam
ek marg-e-naagahaanee aur hai

hazaaroN KHwahishaiN 'eisee ke har KHwahish pe dam nikle
bohot nikle mere armaaN lekin fir bhee kam nikle

Dare kyooN mera qaatil kya rahega uskee gardan par
wo KHooN, jo chashm-e-tar se 'umr bhar yooN dam_ba_dam nikle

nikalna KHuld se aadam ka sunte aayaiN haiN lekin
bohot be_aabru hokar tere kooche se ham nikle

bharam khul jaaye zaalim tere qaamat ki daraazee ka
agar is turra-e-pur_pech-o-KHam ka pech-o-KHam nikle

magar likhwaaye koee usko KHat, to hamse likhawaaye
huee subah aur ghar se kaan par rakhkar qalam nikle

huee is daur meiN mansoob mujhse baada_aashaamee
fir aaya wo zamaana, jo jahaaN se jaam-e-jam nikle

huee jinse tavaqqo KHastagee kee daad paane kee
wo hamse bhee ziyaada KHasta-e-teGH-e-sitam nikle

mohabbat meiN naheeN hai farq jeene aur marne kaa
usee ko dekh kar jeete haiN jis kaafir pe dam nikle

zara kar jor seene par ki teer-e-pursitam nikle
jo wo nikle to dil nikle, jo dil nikle to dam nikle

KHuda ke waaste parda na kaabe se uThaa zaalim
kaheeN 'eisa na ho yaaN bhee wohee kaafir sanam nikle

kahaaN maiKHaane ka darwaaza 'GHalib' aur kahaaN waaiz
par itana jaante haiN kal wo jaata tha ke ham nikle

Mirza Ghalib

dil-e-naadaaN tujhe huaa kya hai ?
aaKHir is dard kee dawa kya hai

ham haiN mushtaaq aur woh bezaar
ya ilaahee ! yeh maajra kya hai ?

maiN bhee muNh meiN zabaan rakhta hooN
kaash ! poocho ki "muddaa kya hai" ?

jab ki tujh bin naheeN koee maujood
fir ye hangaama, 'ei KHuda ! kya hai

ye paree chehara log kaise haiN ?
GHamza-o-ishwa-o-'adaa kya hai ?

shikan-e-zulf-e-ambaree kyoN hai ?
nigah-e-chashm-e-soorma sa kya hai ?

sabza-o-gul kahaaN se aaye haiN ?
abr kya cheez hai, hawa kya hai ?

hamko unse wafa ki hai ummeed
jo naheeN jaante wafa kya hai

haaN bhala kar tera bhala hoga"
aur darvesh kee sada kya hai ?

jaan tum par nisaar karta hooN
maiN naheeN jaanata duaa kya hai

maiNe maana ki kuchch naheeN 'GHalib'
muft haath aaye to bura kya hai ?

Mirza Ghalib

aah ko chaahiye ik 'umr asar hone tak
kaun jeeta hai teree zulf ke sar hone tak ?

daam har mauj meiN hai halqa-e-sad_kaam-e-nahaNg
dekhaiN kya guzre hai qatre pe guhar hone tak

aashiqee sabr talab aur tamanna betaab
dil ka kya rang karooN KHoon-e-jigar hone tak ?

partav-e-khur se hai shabnam ko fana'a ki taaleem
maiN bhee hooN ik inaayat ki nazar hone tak

yak_nazar besh naheeN fursat-e-hastee GHaafil
garmi-e-bazm hai ik raqs-e-sharar hone tak

GHam-e-hastee ka 'Asad' kis'se ho juz marg ilaaz
shamma'a har rang meiN jaltee hai sahar hone tak

Pages