ہر چند غم و درد کی قیمت بھی بہت تھی
لینا ہی پڑا دل کو ضرورت بھی بہت تھی
ظالم تھا وہ اور ظلم کی عادت بھی بہت تھی
مجبور تھے ہم اس سے محبت بھی بہت تھی
گو ترک تعلق میں سہولت بھی بہت تھی
لیکن نہ ہوا ہم سے کہ غیرت بھی بہت تھی
اس بت کے ستم سہہ کے دکھا ہی دیا ہم نے
گو اپنی طبیعت میں بغاوت بھی بہت تھی
واقف ہی نہ تھا رمز محبت سے وہ ورنہ
دل کے لیے تھوڑی سی عنایت ہی بہت تھی
یوں ہی نہیں مشہور زمانہ مرا قاتل
اس شخص کو اس فن میں مہارت بھی بہت تھی
کیا دور غزل تھا کہ لہو دل میں بہت تھا
اور دل کو لہو کرنے کے فرصت بھی بہت تھی
ہر شام سناتے تھے حسینوں کو غزل ہم
جب مال بہت تھا تو سخاوت بھی بہت تھی
بلوا کے ہم عاجزؔ کو پشیماں بھی بہت ہیں
کیا کیجیے کم بخت کی شہرت بھی بہت تھی
har-chand ġham-o-dard ki qimat bhi bahut thi
lena hi paḌa dil ko zarurat bhi bahut thi
zalim tha vo aur zulm ki aadat bhi bahut thi
majbur the ham us se mohabbat bhi bahut thi
go tark-e-ta.alluq men suhulat bhi bahut thi
lekin na hua ham se ki ġhairat bhi bahut thi
us but ke sitam sah ke dikha hi diya ham ne
go apni tabi.at men baġhavat bhi bahut thi
vaqif hi na tha ramz-e-mohabbat se vo varna
dil ke liye thoḌi si inayat hi bahut thi
yuun hi nahin mash.hur-e-zamana mira qatil
us shaḳhs ko is fan men maharat bhi bahut thi
kya daur-e-ġhazal tha ki lahu dil men bahut tha
aur dil ko lahu karne ke fursat bhi bahut thi
har shaam sunate the hasinon ko ġhazal ham
jab maal bahut tha to saḳhavat bhi bahut thi
bulva ke ham 'ajiz' ko pasheman bhi bahut hain
kya kijiye kam-baḳht ki shohrat bhi bahut thi
