جنہیں سحر نگل گئی، وہ خواب ڈھونڈھتا ہوں میں
کہاں گئی وہ نیند کی، شراب ڈھونڈھتا ہوں میں
مجھے نمک کی کان میں مٹھاس کی تلاش ہے
برہنگی کے شہر میں لباس کی تلاش ہے
وہ برف باریاں ہوئیں کہ پیاس خود ہی بجھ گئی
میں ساغروں کو کیا کروں کہ پیاس کی تلاش ہے
گھرا ہوا ہے ابر ماہتاب ڈھونڈھتا ہوں میں
جنہیں سحر نگل گئی، وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
جو رک سکے تو روک دو یہ سیل رنگ و نور کا
مری نظر کو چاہئے وہی چراغ دور کا
کھٹک رہی ہے ہر کرن نظر میں خار کی طرح
چھپا دیا ہے تابشوں نے آئنہ شعور کا
نگاہ شوق جل اٹھی حجاب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
یہ دھوپ زرد زرد سی یہ چاندنی دھواں دھواں
یہ طلعتیں بجھی بجھی، یہ داغ داغ کہکشاں
یہ سرخ سرخ پھول ہیں کہ زخم ہیں بہار کے
یہ اوس کی پھوار ہیں، کہ رو رہا ہے آسماں
دل و نظر کے موتیوں کی آب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
یہ تلخ تلخ راحتیں، جراحتیں لیے ہوئے
یہ خونچکاں لطافتیں کثافتیں لیے ہوئے
یہ تار تار پیرہن عروسۂ بہار کا
یہ خندہ زن صداقتیں قیامتیں لیے ہوئے
زمین کی تہوں میں آفتاب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
جو مرحلوں میں ساتھ تھے وہ منزلوں پہ چھٹ گئے
جو رات میں لٹے نہ تھے وہ دوپہر میں لٹ گئے
مگن تھا میں کہ پیار کے بہت سے گیت گاؤں گا
زبان گنگ ہو گئی، گلے میں گیت گھٹ گئے
کٹی ہوئی ہیں انگلیاں رباب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
یہ کتنے پھول ٹوٹ کر بکھر گئے یہ کیا ہوا
یہ کتنے پھول شاخچوں پہ مر گئے یہ کیا ہوا
بڑھی جو تیز روشنی چمک اٹھی روش روش
مگر لہو کے داغ بھی ابھر گئے یہ کیا ہوا
انہیں چھپاؤں کس طرح نقاب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
خوشا وہ دور بے خودی کہ جستجوئے یار تھی
جو درد میں سرور تھا تو بے کلی قرار تھی
کسی نے زہر غم دیا تو مسکرا کے پی گئے
تڑپ میں بھی سکوں نہ تھا، خلش بھی سازگار تھی
حیات شوق کا وہی سراب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
خلوص بے شعور کی وہ زود اعتباریاں
وہ شوق سادہ لوح کی حسین خامکاریاں
نئی سحر کے خال و خد، نگاہ میں بسے ہوئے
خیال ہی خیال میں، وہ حاشیہ نگاریاں
جو دے گیا فریب وہ، شباب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
وہ لعل و لب کے تذکرے، وہ زلف و رخ کے زمزمے
وہ کاروبار آرزو وہ ولولے، وہ ہمہمے
دل و نظر کی جان تھا وہ دور جو گزر گیا
نہ اب کسی سے دل لگے نہ اب کہیں نظر جمے
سمند وقت جا چکا رکاب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
نہ عشق با ادب رہا، نہ حسن میں حیا رہی
ہوس کی دھوم دھام ہے، نگر نگر، گلی گلی
قدم قدم کھلے ہوئے ہیں مکر و فن کے مدرسے
مگر یہ میری سادگی تو دیکھیے کہ آج بھی
وفا کی درس گاہوں کا نصاب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
بہت دنوں میں راستہ حریم ناز کا ملا
مگر حریم ناز تک پہنچ گئے تو کیا ملا
مرے سفر کے ساتھیو! تمہیں سے پوچھتا ہوں میں
بتاؤ کیا صنم ملے، بتاؤ کیا خدا ملا
جواب چاہئے مجھے جواب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں
jinhen sahar nigal gai, vo ḳhvab DhunDhta huun main
kahan gai vo niind kii, sharab DhunDhta huun main
mujhe namak ki kaan men miThas ki talash hai
barahnagi ke shahr men libas ki talash hai
vo barf-bariyan huiin ki pyaas ḳhud hi bujh gai
main saġharon ko kya karun ki pyaas ki talash hai
ghira hua hai abr mahtab DhunDhta huun main
jinhen sahar nigal gai, vo ḳhvab DhunDhta huun main
kahan gai vo niind ki sharab DhunDhta huun main
jo ruk sake to rok do ye sail rang-o-nur ka
miri nazar ko chahiye vahi charaġh duur ka
khaTak rahi hai har kiran nazar men ḳhaar ki tarah
chhupa diya hai tabishon ne aa.ina shu.ur ka
nigah-e-shauq jal uThi hijab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main
ye dhuup zard zard si ye chandni dhuan dhuan
ye tal.aten bujhi bujhi, ye daaġh daaġh kahkashan
ye surḳh surḳh phuul hain ki zaḳhm hain bahar ke
ye os ki phuvar hain, ki ro raha hai asman
dil o nazar ke motiyon ki aab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main
ye talḳh talḳh rahaten, jarahaten liye hue
ye ḳhun-chakan latafaten kasafaten liye hue
ye taar taar pairahan urusa-e-bahar ka
ye ḳhanda-zan sadaqaten qayamaten liye hue
zamin ki tahon men aftab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main
jo marhalon men saath the vo manzilon pe chhuT ga.e
jo raat men luTe na the vo dopahar men luT ga.e
magan tha main ki pyaar ke bahut se giit ga.unga
zaban gung ho gai, gale men giit ghuT ga.e
kaTi hui hain ungliyan rubab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main
ye kitne phuul TuuT kar bikhar ga.e ye kya hua
ye kitne phuul shaḳhchon pe mar ga.e ye kya hua
baḌhi jo tez raushni chamak uThi ravish ravish
magar lahu ke daaġh bhi ubhar ga.e ye kya hua
inhen chhupa.un kis tarah naqab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main
ḳhusha vo daur-e-be-ḳhudi ki justuju-e-yar thi
jo dard men surur tha to be-kali qarar thi
kisi ne zahr-e-ġham diya to muskura ke pi ga.e
taḌap men bhi sukun na thaa, ḳhalish bhi sazgar thi
hayat-e-shauq ka vahi sarab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main
ḳhulus-e-be-shu.ur ki vo zud-etabariyan
vo shauq-e-sada-lauh ki hasin ḳham-kariyan
na.i sahar ke ḳhal-o-ḳhad, nigah men base hue
ḳhayal hi ḳhayal men, vo hashiya-nigariyan
jo de gaya fareb vo, shabab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main
vo la.al o lab ke tazkire, vo zulf o ruḳh ke zamzame
vo karobar-e-arzu vo valvale, vo hamhame
dil o nazar ki jaan tha vo daur jo guzar gaya
na ab kisi se dil lage na ab kahin nazar jame
samand-e-vaqt ja chuka rikab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main
na ishq ba-adab raha, na husn men haya rahi
havas ki dhum-dham hai, nagar nagar, gali gali
qadam qadam khule hue hain makr-o-fan ke madrase
magar ye meri sadgi to dekhiye ki aaj bhi
vafa ki dars-gahon ka nisab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun men
bahut dinon men rasta harim-e-naz ka mila
magar harim-e-naz tak pahunch ga.e to kya mila
mire safar ke sathiyo! tumhin se puchhta huun main
batao kya sanam mile, batao kya ḳhuda mila
javab chahiye mujhe javab DhunDhta huun main
jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main
