Parveen Shakir Ghazal

chalne ka hausla nahin rukna muhaal kar diya | Parveen Shakir

chalne ka hausla nahin rukna muhaal kar diya
ishq ke is safar ne to mujhko niDhaal kar diya

ai meri gul-zamin tujhe chaah thi ek kitab ki
ahl-e-kitab ne magar kya tera haal kar diya

milte hue dilon ke beech aur tha faisla koi
usne magar bichhaDte waqt aur sawal kar diya

ab ke hawa ke sath hai daman-e-yar muntazir
banu-e-shab ke hath men rakhna sambhaal kar diya

mumkina faislon men ek hijr ka faisla bhi tha
humne to ek baat ki usne kamal kar diya

Barish hui to phulon ke tan chak ho gaye

Barish hui to phulon ke tan chak ho gaye
mausam ke hath bhig ke saffak ho gaye

baadal ko kya khabar ke barish ki chah main
kitne buland-o-bala shajar khaak ho gaye

jugnu ko din ke waqt pakarne ki zid karen
bache hamare ahad ke chalak ho gaye

lahra rahi hai barf ki chadar hata ke ghas
suraj ki shah pe tinak bhi bebak ho gaye

suraj dimag log bhi iblag-e-fikr main
zulf-e-shab-e-firaq ke pechak ho gaye

jab bhi garib-e-shahar se kuch guftagu hui
lahaje hawa-e-sham ke namnak ho gaye

chehra mera tha nigahein us ki

chehra mera tha nigahein us ki
Khamoshi men bhi wo baatein us ki

mere chehre pe Ghazal likhti gain
sher kahti hui aaNkhein us ki

ShoKh lamhon ka pata dene lagin
tez hoti hui saaNsen us ki

aise mausam bhi guzaare ham ne
subahen jab apani thin shaamein us ki

dhyaan men us ke ye aalam thaa kabhi
aaNkh mahataab ki yaaden us ki

faisla mauj-e-hawaa ne likkha
aaNdhiyaaN meri bahaarein us ki

nind is soch se TuTi aksar
kis tarah kaTti hain raatein us ki

phooloN ka bikharna to muqaddar hi tha lekin

rasta bhi kaThin, dhoop meiN shiddat bhi bohat thi
saaye se magar us ko mohabbat bhi bohat thi

kheme na koi mere musaafir ke jalaaye
zakhmi tha bohat paaoN musaafat bhi bohat thi

sab dost mre muntazir-e-parda-e-shab the
din meiN to safar karne meiN diqqat bhi bohat thi

barrish ki duaaoN meiN nami aaNkhi ki mil jaaye
jazbe ki kabhi itni rafaaqat bhi bohat thi

mushkil hai ab shahar men nikle koi ghar se

mushkil hai ab shahar men nikle koi ghar se
dastaar pe baat aa gai hai hoti hui sar se

barsaa bhi to kis dasht ke befaiz badan par
ik umr mere khet the jis abr ko tarse

is baar jo indhan ke liye kaT ke giraa hai
chiDyon ko baDaa pyaar thaa us buDhe shajar se

mehnat meri aaNdhi se to mansoob nahi thi
rahnaa tha koi rabt shajar ka bhi samar se

Khud apne se milne kaa to yaraa na tha mujh men
main bhiD men gum ho gai tanhai ke Dar se

benaam musafat hi muqaddar hai to kyaa Gam
manzil kaa ta'yyun kabhi hotaa hai safar se

justaju khoye huon ki umr bhar karte rahe

justaju khoye huon ki umr bhar karte rahe
chaaNd ke ham_raah ham har shab safar karte rahe

raaston kaa ilm thaa ham ko na simton ki Khabar
shahar-e-naamaalum ki chaahat magar karte rahe

ham ne Khud se bhi chhupayaa aur saare shahar se
tere jaane ki Khabar dar-o-divaar karte rahe

vo na aayegaa hamen maalum thaa us shaam bhi
intazaar us ka magar kuchh soch kar karte rahe

aaj aayaa hai hamen bhii un uDaanon kaa Khayaal
jin ko tere zaum men be-baal-o-par karate rahe

Perveen Shakir

kuchh to havaa bhi sard thi kuchh thaa teraa Khayaal bhi

kuchh to havaa bhi sard thi kuchh thaa teraa Khayaal bhi
dil ko Khushi ke saath saath hotaa rahaa malaal bhi

baat vo aadhi raat ki raat vo poore chaaNd ki
chaaNd bhi ain chet kaa us pe teraa jamaal bhi

sab se nazar bachaa ke vo mujh ko aise dekhate
ek dafaa to ruk gai gardish-e-maah-o-saal bhi

dil to chamak sakegaa kyaa phir bhi taraash ke dekh lo
shishaagaraan-e-shahar ke haath kaa ye kamaal bhi

us ko na paa sake the jab dil kaa ajiib haal thaa
ab jo palaT ke dekhiye baat thi kuchh muhaal bhi

kuu-ba-ku phail gai baat shanasaai ki

kuu-ba-kuu phail gai baat shanaasaai ki
us ne Khushbuu ki tarah meri paziraai ki

kaise kah duuN ki mujhe chhoD diyaa hai us ne
baat to sach hai magar baat hai rusvaai ki

vo kahin bhi gayaa lauTaa to mere paas aayaa
bas yahi baat hai achchhi mere harajaai ki

teraa pahalu tere dil ki tarah aabaad rahe
tujh pe guzare na qayaamat shab-e-tanhaai ki

us ne jalati hui peshaani pe jo haath rakhaa
ruuh tak aa gai taasir masihaai ki

Perveen Shakir

sundar komal sapanon kii baaraat guzar ga_ii jaanaaN

sundar komal sapanon kii baaraat guzar ga_ii jaanaaN
dhuup aaNkhon tak aa pahuNchii hai raat guzar ga_ii jaanaaN

bhor samay tak jis ne hamen baaham ulajhaaye rakhaa
vo albelii resham jaisii baat guzar ga_ii jaanaaN

sadaa kii dekhii raat hamen is baar milii to chup ke se
Khaalii haath pe rakh ke kyaa sauGaat guzar ga_ii jaanaaN

kis konpal kii aas men ab tak vaise hii sar-sabz ho tum
ab to dhuup kaa mausam hai barasaat guzar ga_ii jaanaaN

rukane kaa samay guzar gayaa hai

rukane kaa samay guzar gayaa hai
jaanaa teraa ab Thahar gayaa hai

ruKhsat kii ghaDii khaDii hai sar par
dil ko_ii do-niim kar gayaa hai

maatam kii fazaa hai shahar-e-dil men
mujh men ko_ii shaKhs mar gayaa hai

bujhane ko hai phir se chashm-e-nargis
phir Khvaab-e-sabaa bikhar gayaa hai

bas ik nigaah kii thii us ne
saaraa cheharaa nikhar gayaa hai

Pages