Welcome To Urdu Shayari

Misl-e-Khayaal aaye the aa kar chale gaye
Duniyaa hamaari Gham ki basaa kar chale gaye
Phoolo.n ki aas dil se lagaaye hue the ham
Kaante vo raste me.n bichhaa kar chale gaye
Aayi na thi hamaare chaman me.n bahaar abhi
Wo Khaab aashiyaa.N me.n lagaa kar chale gaye
Bhuule se bhi kabhi na dil ham bhulaa sake
Dil se hame.n vo apane bhulaa kar chale gaye
Fani Badayuni

Hosh waalo.n ko Khabar kyaa beKhudi kyaa chiz hai
Ishq kije phir samajhiye zindagi kyaa chiz hai
 
Un se nazare.n kyaa mili raushan fizaaye.n ho gai.n
Aaj jaanaa pyaar ki jaaduugari kyaa chiz hai
 
Khulti zulfo.n ne sikhaai mausamo.n ko shaayari
Jhukti aa.Nkho.n ne bataaya maikashi kyaa chiz hai
 
Ham labo.n se kah na paaye un se haal-e-dil kabhi
Aur vo samajhe nahi.n ye Khaamoshi kyaa chiz hai
Nida Fazli

mohabbat na samajh hoti hai, samjhana zaroori hai
jo dil mein hai use aankhon se kehalwana zaroori hai
usoolon par jo aanch aaye to takrana zaroori hai
jo zinda hai to fir zinda nazar aana bhi zaroori hai
bohot bebaak aankhon mein talluq tik nahin sakta
mohabbat mein kashish rakhne ko sharmana zaroori hai
saleeqa hi nahi shayad use mehsoos karne ka
jo kehte hai gar khuda hai to nazar aana bhi zaroori hai
Majid Deobandi

Saare Jaahaan Se Achchha Hindustan Hamaara
Hum Bulbulein Hain Isski Ye Gulistan Hamaara
Ghurbat Mein Ho Agar Hum Rehta Hai Dil Watan Mein
Samjhon Wahiin Hamein Bhi Dil Ho Jahaa Hamaara
Parbat Woh Sab Se Uncha Hamsaaya Aasmaan Ka
Woh Santary Hamaara_Woh Paasbaan Hamaara
Godi Mein Khilti Hain Isski Hazaaron Naddian
Gulshan Hai Jinke Dam Se Rashk-e-Jinaa Hamaara
Aye Aab-e-Rod-e-Ganga Woh Din Hain Yaad Tujhko
Utra Tere Kinaare Jab Caarvan Hamaara
Mazhab Nahin Sikhaata Aapas Mein Beir Rakhna
Hindi Hain Hum_Watan Hai Hindustan Hamaara
Unaan-o-Misr-o-Roma Sab Mit Gaye Jahaan Se
Ab Tak Magar Hai Baaqi Naam-o-Nishaan Hamaara
Kuchh Baat Hai Ke Hasti Mit-ti Nahin Hamaari
Sadion Raha Hai Dushman Daur-e-Zamaan Hamaara
“Iqbal”, Koi Mahram Aapna Nahin Jahaan Mein
Maalum Kya Kisi Ko Dard-e-Nihaan Hamaara**
ALLAMA IQBAL

Tere ishq ki intaha chaahata hoon
Meri saadgi dekh kya chaahata hoon
Sitam ho ki ho vaada-e-behijaabi
Koi baat sabr-aazama chaahata hoon

Yeh jannat mubarak rahe zaahidon ko
Ki main aap ka saamna chaahata hoon

Koi dam ka mehaman hoon aye ahal-e-mahfil
Chiraag-e-sahar hoon, bujha chaahata hoon

Bhari bazm mein raaz ki baat kah di
Bada be-adab hoon, saza chaahata hoon.
Allama Sir Mohammad Iqbal

ahl-e-dil aur bhi hain ahl-e-vafa aur bhi hain
ek ham hi nahin duniya se Khafaa aur bhi hain
kyaa hua gar mere yaaron ki zabaanen chup hain
mere shaahid mere yaaron ke siva aur bhi hain
ham pe hi Khatm nahin maslak-e-shorida_sari
chaak-e-dil aur bhi hai chaak-e-qabaa aur bhi hain
sar salaamat hai to kyaa sang-e-malaamat ki kami
jaan baaqi hai to paikaan-e-qazaa aur bhi hain
munsif-e-shahar ki vahdat pe na harf aa jaaye
log kahte hain ke arbaab-e-jafaa aur bhi hai.n
Sahir Ludhyanvi

aap bevajah pareshaan-sii kyo.n hai.n maadaam
log kahate hai.n to phir Thiik hii kahate ho.nge
mere ehabaab ne tahaziib na siikhii hogii
mere maahaul me.n i.nsaan na rahate ho.nge
nuur-e-saramaayaa se hai ruu-e-tamaddun kii jilaa
ham jahaa.N hai.n vahaa.N tahaziib nahii.n pal sakatii
mufalisii hiss-e-lataafat ko miTaa detii hai
bhuuk aadaab ke saa.Nche me.n nahii.n Dhal sakatii
log kahate hai.n to logo.n pe t’ajjub kaisaa
sach to kahate hai.n ki naadaaro.n kii izzat kaisii
log kahate hai.n – magar aap abhii tak chup hai.n
aap bhii kahiye Gariibo.n me.n sharaafat kaisii
lek maadaam! Bahut jald vo daur aayegaa
jab hame.n ziist ke adavaar parakhane ho.nge
apanii zillat kii qasam, aap kii azamat kii qasam
hamako taa’ziim ke me_aar parakhane ho.nge
hamane har daur me.n tazaliil sahii hai lekin
hamane har daur ke chehare ko ziyaa baKhshii hai
hamane har daur me.n mehanat ke sitam jhele hai.n
hamane har daur ke haatho.n ko hinaa baKhshii hai
lekin in talKh mubaahis se bhalaa kyaa haasil
log kahate hai.n to phir Thiik hii kahate ho.nge
mere ehabaab ne tahaziib na siikhii hogii
mere maahaul me.n i.nsaan na rahate ho.nge
Sahir Ludhyanvi
MEANING
——–
[maadaam=Urdu equivalent of Madam]
[ehabaab=friends; maahaul=environment/surrounding]
[nuur-e-saramaayaa=light of wealth; ruu-e-tamaddun=face of civilization]
[jilaa=shine/brightness; hiss-e-lataafat=finer feelings]
[aadaab=genteel/civilized/politeness]
[naadaaro.n=poor]
[lek=lekin]
[ziist=life; adavaar=values; zillat=humiliation]
[azamat=greatness; taa’ziim=respect; me_aar=level]
[tazaliil=insult; ziyaa=brightness/brilliance]
[talKh=bitter; mubaahis=arguments]