Welcome To Urdu Shayari

ab ke ham bichhDe to shaayad kabhi Khaabon men milen
jis tarah suukhe hue phuul kitaabon men milen
DhuuNDh ujaDe hue logon men vafaa ke motii
ye Khazaane tujhe mumkin hai Kharaabon men milen
tuu Khudaa hai na meraa ishq farishton jaisaa
donon insaaN hain to kyon itane hijaabon men milen
Gam-e-duniyaa bhii Gam-e-yaar men shaamil kar lo
nashaa baDataa hai sharaben jo sharaabon men milen
aaj ham daar pe khenche gaye jin baaton par
kyaa ajab kal vo zamaane ko nisaabon men milen
ab na vo main huuN na tu hai na vo maazii hai Faraaz
jaise do shaKhs tamannaa ke saraabon mem milen

Usne sukoot-e-shab mein bhi apna payaam rakh diya
Hijr ki raat baam per maah-e-tamaam rakh diya
Aamad-e-dost ki naveed koo-e-wafa mein garm thi
Meine bhi ik charagh sa dil sar-e-shaam rakh diya
Shiddat-e-tishnagi mein bhi ghairat-e-maikashi rahi
Usne jo phair li nazar meine bhi jaam rakh di
Usne nazar nazar mein he aisay bhalay sukhan kahey
Meine to uske paaon mein saara kalaam rakh diya
Dekho woh merey khwaab thay dekho yeh mere zakhm hain
Meine to sab hisaab-e-jaan barsar-e-aam rakh diya
Ake bahaar ne bhi keen aisi shararatein ke bus
Kubk-e-Dari ki chaal mein tera khiraam rakh diya
Jo bhi mila usi ka dil halqa baghosh-e-yaar tha
Usne to saaray shehr ko karke ghulaam rakh diya
Aur faraz chahiyein kitni mohabbatein tujhe
Maaon ne tere naam pe bachon ka naam rakh diya
By : - Ahmad Faraz

sabz maddham roshani men surKh aaNchal ki dhanak
sard kamare men machalatii garm saaNson kii mahak
baazuuon ke sakht halqe men ko_i naazuk badan
silvaTen malabuus par aaNchal bhii kuchh Dhalakaa huaa
garmii-e-ruKhsaar se dahaki hu_i ThaanDii havaa
narm zulfon se mulaayam uNgaliyon kii chheD chhaaD
surKh honThon par sharaarat ke kisi lamhen kaa aks
reshami baahon men chuuDi ki kabhi maddham dhanak
sharmagin lahajon men dhire se kabhi chaahat ki baat
do dilon ki dhaDakanon men guuNjati thi ek sadaa
kaaNpate honThon pe thi allaah se sirf ek duaa
kaash ye lamhe Thahar jaayen Thahar jaayen zaraa
Parveen Shakir