Welcome To Urdu Shayari

us ko juda hue bhi zamana bahut hua
ab kya kahen ye qissa purana bahut hua
Dhalti na thi kisi bhi jatan se shab-e-firaaq
ai marg-e-naagahaaN teraa aanaa bahut huaa
ham Khuld se nikal to gaye hain par ai Khudaa
itne se vaaqye kaa fasaanaa bahut huaa
ab ham hain aur saare zamaane ki dushmani
us se zaraa rabt baDhaanaa bahut hua
ab kyon na zindagi pe muhabbat ko vaar den
is aashiqi men jaan se jaanaa bahut hua
ab tak to dil ka dil se ta-arruf na ho sakaa
maanaa ki us se milnaa milanaa bahut hua
kya kya na ham Kharab hue hain magar ye dil
ai yaad-e-yaar teraa Thikanaa bahut huaa
kahta thaa naasehon se mere muNh na aa_io
phir kyaa thaa ek huu ka bahanaa bahut hua
lo phir tere labon pe usi bevafaa ka zikr
ahmad 'Faraz' tujh se kaha naa bahut hua
By : Ahmad Faraz

Teri Bargah Mein Ay Khuda, Junhi Sar Ko Maine Jukha Diya,
Usi Waqt Teri Khudayi Ne, Mujhe pastiyon Se Utha Diya,
Main Zaleel Tha Main Haqeer Tha, Tere Dar ka Aik Faqeer Tha,
Tu Ne Aik Hi Sajday Mein, Mujhe Kya Se Kya Bana Diya,
Rag-e-Jaan Se Bhi Tu Qareeb hai,Tu Hi Likhta Sab K Naseeb Hai,
Jisay Chaha Pal Mein Utha Diya, Jisay Chaha Pal Mein Gira Diya…..!!!!

woh gumaan gumaan sa qayas sa
kabhi door sa kabhi paas sa
kabhi chandni main chupa hua
kabi khushbuoon main basa hua
kabhi sirf us ki shabahatain
kabhi sirf us ki hikayatain
kabhi sirf milnay k silsilay
kabhi sirf us say hi faaslay
kabhi door chalti hawaoon main
kabhi meenh barasti ghataoon main
kabhi bad-gumaan kabhi meherbaan
kabhi dhoop hai kabhi saayebaan
kabhi band dil ki kitaab main
kabhi lab kushaan woh khwab main
kabhi youn k jaisay sawal ho
kabhi youn k jaisay khayal ho
kabhi dekhnay k hain silsilay
kabhi sochnay k hain marhalay
kabhi sirf rang-e-bahar sa
kabhi sirf ik ghubaar sa
kabhi dastaras k qareeb qareeb
kabhi door paas kahin nahi
yeh jo ukhrra ukhrra sa shakhs hai
yeh jo bikhra bikhra sa shakhs hai...