Welcome To Urdu Shayari

ik muamma hai samajhne ka na samjhaane ka
zindagii kahe ko hai Khvaab hai deevane ka
zindagi bhi to pashemaan hai yaha lake mujhe
dhundhatii hai koi hila mere mar jaane ka
haddiyaaN hai kai lipTi hui zanjiron me
liye jaate hai janaaza tere deevane ka
tum ne dekha hai kabhi ghar ko badalte hue rang
aao dekho na tamashaa mere ghum_Khane ka
ab ise dar pe leja ke sula de saqi
yu behaknaa nahi achcha tere deevane ka
hum ne chaani hai bahut dair-o-haram ki galiyaan
kahi payaa na Thikana tere deevane ka
har nafas umr-e-guzashta ki hai mayyat “Fani”
zindagi naam hai mar mar ke jiye jaane ka
By : Fani Badayuni

gulo me rag bhare baad-e-nau-bahaar chale
chale bhi aao ke gulshan ka kaar-o-baar chale
qafas udas hai yaro saba se kuchh to kaho
kahi to bahar-e-khuda aaj zikr-e-yaar chale
kabhi to subh tere kunj-e-lab se ho aagaz
kabhi to shab sar-e-kaakul se mushkabar chale
bada hai dard ka rishta ye dil garib sahi
tumhare naam pe ayege gam-gusaar chale
jo ham pe guzari so guzari magar shab-e-hijraan
hamare ashk teri aakabat sanwar chale
huzur-e-yaar hui daftar-e-junun ki talab
girah me le ke gireban ka tar tar chale
makaam 'faiz' koi raah me jancha hi nahi
jo ku-e-yaar se nikale to su-e-daar chale
 
By :  Faiz Ahmad Faiz

jo bhi bura bhala hai allah janta hai
bande ke dil me kya hai allah janta hai
ye farsh-o-arsh kya hai allah janta hai
pardon me kya chupa hai allah janta hai
jakar jahan se koi vapas nahi hai aata
vo kaun si jagah hai allah janta hai
neki-badi ko apne kitna hi tu chupaye
allah ko sab pata hai allah janta hai
ye dhuup-chhao dekho ye subah-shaam dekho
sab kyu ye ho raha hai allah janta hai
kismat ke naam ko to sab jante hai lekin
kismat me kya likha hai allah janta hai