Welcome To Urdu Shayari

mohabbat tark ki mai ne garebaaN si liya mai ne
zamaane ab to Khush ho zahar ye bhi pi liya mai ne
abhi zinda huN lekin sochta rahta huN Khalvat men
ki ab tak kis tamanna ke sahaare ji liya mai ne
unhe apnaa nahin sakta magar itna bhi kya kam hai
ki kuchh muddat hasin Khaabon mein kho kar ji liyaa mai ne
bas ab to daaman-e-dil chhoD do bekaar ummido
bahut dukh sah liye mai ne bahut din ji liya mai ne
Sahir Ludhyanvi

KaruN na yaad agar kis tarah bhulauN use
Ghazal bahana karuN aur gungunauN use
Wo Khaar-Khaar hai shaaKh-e-gulaab ki maanind
Main zaKhm-zaKhm huN phir bhi gale lagauN use
Ye log tazkare karte hain apne logon se
Main kaise baat karuN aur kahaaN se lauN use
Magar wo zudfaraamosh zud ranj bhi hai
ke rooTh jaaye agar yaad kuchh dilauN use
Wahi jo daulat-e-dil hai wahi jo raahat-e-jaaN
Tumhaari baat pe ai naasiho gaNvauN use
Jo hamsafar sar-e-manzil bichhaD rahaa hai 'Faraz'
Ajab nahin ki agar yaad bhi na aauN use

Zindagi hum ne bata tera bigada kia hai
Har sitam hum pe rawa hai ye tamasha kia hai
Teri khushyon pe mera haq hi nahi jab koi
Phir bhala gham se mere tera bhi rishta kia hai
Bhuk jati hi nahi lakh jatan karta hun
Palne wale mera rizq se jhagda kia hai
Main to lut-ta bhi raha chain se sota bhi raha
Lootne wale bata tune kamaya kia hai
Main tere pyar ke qabil to nahi hun lekin
Soch mujhko bhi nafi karne se bachta kia hai
Log karte hain ebadat bhi tejarat ki tarah
Pahle ye sochte hain badle me milta kia hai
Ghar na masjid na sanam khana chale iske beghair
Shad kahne ko sabhi kahte hain paisa kia hai
Amin Shad