Welcome To Urdu Shayari

Hum Tere Shahar Mein Aaye Hain Musafir Ki Tarah
Sirf Ek Baar Mulaqaat Ka Mauqa De De
Meri Manzil Hai Kahan Mera Thikana Hai Kaha
Subah Tak Tujh Se Bichhad kar Mujhe Jaana Hai Kaha
Sochne Ke Liye Ek Raat Ka Mauqa De De
Apni Aankho Mein Chhupa Rakkhe Hai Jugnu Main ne
Apni PalkoN Pe Saja Rakkhe Hain Aansu Main ne
Meri Aankho Ko Bhi Barsaat Ka Mauqa De De
Aaj Ki Raat Mera Dard-e-Muhaabat Sun Le
Kap Kapate Huae Hotho Ki Shikaayat Sun Le
Aaj Izhaar-e-Khayaalat Ka mauqa De De
Bhulna Tha Toh Ye Iqraar kiyaa hi Kyuu Tha
Bewafa Tune mujhe Pyar Kiya Hi Kyun tha
Sirf Do-Chaar Sawalat Ka Mauqa De De
Hum Tere Shehar Mein Aaye Hain Musafir Ki Tarah
Sirf Ek Baar Mulaqaat Ka Mauqa De De
Qaiser ul Jafri

Ab ke tajdid-e-wafaa ka nahi imkaN janaN
Yaad kyaa tujh ko dilayeN tera paimaN janaN
Yun hi mausam ki ada dekh ke yad aya hai
Kis qadar jald badal jate hain insaN janaN
zindagi teri ata thi so tere nam ki hai
ham ne jaise bhi basar ki tera ehsaaN janaN
Dil ye kahta hai ki shayad ho fasurdaa tu bhi
Dil ki kya bat karen dil to hai nadaN janaN
Awwal-awwal ki muhabbat ke nashe yad to kar
Be-piye bhi teraa chehra tha gulistaN janaN
AaKhir aaKhir to ye aalam hai ki ab hosh nahin
Rag-e-minaa sulag uThi ki rag-e-jaN janaN
Muddaton se ye alam na tavaqqo na ummiid
Dil pukare hi chala jata hai janaN janaN
Ham bhi kya sada the ham ne bhi samajh rakha tha
Gam-e-dauraaN se juda hai Gam-e-janaN janaN
Ab ki kuchh aisi saji mahafil-e-yaraN janaN
Sar-ba-zanu hai koi sar-ba-girebaN janaN
Har koi apni hi aawaaz se kaaNp uThta hai
Har koi apne hi saaye se hirasaaN janaaN
Jis ko dekho Wahi zanjeer-ba-paa lagta hai
shahar ka shahar hua daaKhil-e-zindaaN janaaN
Ab tera zikr bhi shaayad hi Ghazal men aaye
Aur se aur huaa dard ka unwaaN janaaN
Ham ki ruThi hui rut ko bhi mana lete the
Ham ne dekha hi na tha mausam-e-hijraaN jaanaaN
Hosh aaya to sabhi Khwaab the reza-reza
Jaise uDte huye auraaq-e-pareshaN janaaN
Ahmad Faraz

Duniya Jise Kahate Hain Jaadu Ka Khilona Hai
Mil Jaaye To Mitti Hai Kho Jaaye To Sona Hai
Achhaa Sa Koyi Mausam Tanaha Sa Koyi Aalam
Har Waqt Ka Rona To Bekaar Ka Rona Hai
Barsaat Ka Baadal To Deewana Hai Kya Jaane
Kis Raah Se Bachna Hai Kis Chhat Ko Bhigona Hai
Gam Ho Ki Khushi Dono Kuchh Der Ke Saathi Hain
Phir Rasta Hi Rasta Hai Hansna Hai Na Rona Hai
-------------
Play this Ghazal
Duniya Jise Kahate Hain Jaadu Ka Khilona Hai
By : Nida Fazli