Welcome To Urdu Shayari

rasta bhi kaThin, dhoop meiN shiddat bhi bohat thi
saaye se magar us ko mohabbat bhi bohat thi
kheme na koi mere musaafir ke jalaaye
zakhmi tha bohat paaoN musaafat bhi bohat thi
sab dost mre muntazir-e-parda-e-shab the
din meiN to safar karne meiN diqqat bhi bohat thi
barrish ki duaaoN meiN nami aaNkhi ki mil jaaye
jazbe ki kabhi itni rafaaqat bhi bohat thi
kuchchh to tere mausam hi mujhe raas kam aaye
aur kuchchh mri miTTi meiN baghaawat bhi bohat thi
phooloN ka bikharna to muqaddar hi tha lekin
kuchchh is meiN hawaaoN ki siyaasat bhi bohat thi
is tark-e-rafaaqat pe pareshaaN to hooN lekin
ab tak ke tere saath pe hairat bhi bohat thi
khush aaye tujhe shehr-e-munaafiq ki ameeri
hum logoN ko sach kehne ki aadat bhi bohat thi
Perveen Shakir

Hans ke gham sehle magar gham ko muqadar na bana
Dil ko har haal main dil rehne de pathar na bana
Khwaab to khawaab hai tootega to dil tootega
Jhoothe khwabon se koi zakhm to dil par na bana
Aaj munh mod liya usne to ehsaas hua
Dil ye kehta raha har ek ko dilbar na bana..

Mohabbat kerny walon ko koee rasta nahi deta,
Zameen waqif nahi banti ,falak saya nahi deta,
Udasi jis k dil mein ho usi ki neend urrti hae,
kisi ko apni aankhon ka koee sapna nahi deta,
Khushi or dukh k mosam sab k apny apny hoty haen,
Kisi ko apny hissey ka koee lamha nahi deta,
Uthana khud hi parrta hae thaka toota badan apna,
K jab tak saans chalti hae ,koee kandha nahi deta.