اٹھو مری دنیا کے غریبوں کو جگا دو
کاخ امرا کے در و دیوار ہلا دو
گرماؤ غلاموں کا لہو سوز یقیں سے
کنجشک فرومایہ کو شاہیں سے لڑا دو
سلطانی جمہور کا آتا ہے زمانہ
جو نقش کہن تم کو نظر آئے مٹا دو
جس کھیت سے دہقاں کو میسر نہیں روزی
اس کھیت کے ہر خوشۂ گندم کو جلا دو
کیوں خالق و مخلوق میں حائل رہیں پردے
پیران کلیسا کو کلیسا سے اٹھا دو
حق را بسجودے صنماں را بطوافے
بہتر ہے چراغ حرم و دیر بجھا دو
میں ناخوش و بے زار ہوں مرمر کی سلوں سے
میرے لیے مٹی کا حرم اور بنا دو
تہذیب نوی کار گہہ شیشہ گراں ہے
آداب جنوں شاعر مشرق کو سکھا دو
uTTho miri duniya ke gharibon ko jaga do
kaḳh-e-umra ke dar o divar hila do
garmao ghulamon ka lahu soz-e-yaqin se
kunjishk-e-faromaya ko shahin se laḌa do
sulatani-e-jamhur ka aata hai zamana
jo naqsh-e-kuhan tum ko nazar aae miTa do
jis khet se dahqan ko mayassar nahin rozi
us khet ke har ḳhosha-e-gandum ko jala do
kyuun ḳhaliq o maḳhluq men haail rahen parde
piran-e-kalisa ko kalisa se uTha do
haq ra ba-sajude sanaman ra ba-tavafe
behtar hai charagh-e-haram-o-dair bujha do
main na-ḳhush o be-zar huun marmar ki silon se
mere liye miTTi ka haram aur bana do
tahzib-e-navi kargah-e-shishagaran hai
adab-e-junun shair-e-mashriq ko sikha do
