تمہیں دل لگی بھول جانی پڑے گی محبت کی راہوں میں آ کر تو دیکھو
تڑپنے پہ میرے نہ پھر تم ہنسو گے کبھی دل کسی سے لگا کر تو دیکھو
وفاؤں کی ہم سے توقع نہیں ہے مگر ایک بار آزما کر تو دیکھو
زمانے کو اپنا بنا کر تو دیکھا ہمیں بھی تم اپنا بنا کر تو دیکھو
خدا کے لیے چھوڑ دو اب یہ پردہ کہ ہیں آج ہم تم نہیں غیر کوئی
شب وصل بھی ہے حجاب اس قدر کیوں ذرا رخ سے آنچل اٹھا کر تو دیکھو
جفائیں بہت کیں بہت ظلم ڈھائے کبھی اک نگاہ کرم اس طرف بھی
ہمیشہ ہوئے دیکھ کر مجھ کو برہم کسی دن ذرا مسکرا کر تو دیکھو
جو الفت میں ہر اک ستم ہے گوارا یہ سب کچھ ہے پاس وفا تم سے ورنہ
ستاتے ہو دن رات جس طرح مجھ کو کسی غیر کو یوں ستا کر تو دیکھو
اگرچہ کسی بات پر وہ خفا ہیں تو اچھا یہی ہے تم اپنی سی کر لو
وہ مانیں نہ مانیں یہ مرضی ہے ان کی مگر ان کو پرنمؔ منا کر تو دیکھو
tumhen dil-lagi bhuul jaani paḌegi mohabbat ki rahon men aa kar to dekho
taḌapne pe mere na phir tum hansoge kabhi dil kisi se laga kar to dekho
vafaon ki ham se tavaqqo nahin hai magar ek baar aazma kar to dekho
zamane ko apna bana kar to dekha hamen bhi tum apna bana kar to dekho
ḳhuda ke liye chhoḌ do ab ye parda ki hain aaj ham tum nahin ġhair koi
shab-e-vasl bhi hai hijab is qadar kyon zara ruḳh se anchal uTha kar to dekho
jafa.en bahut kiin bahut zulm Dhaa.e kabhi ik nigah-e-karam is taraf bhi
hamesha hue dekh kar mujh ko barham kisi din zara muskura kar to dekho
jo ulfat men har ik sitam hai gavara ye sab kuchh hai pas-e-vafa tum se varna
satate ho din-rat jis tarah mujh ko kisi ġhair ko yuun sata kar to dekho
agarche kisi baat par vo ḳhafa hain to achchha yahi hai tum apni si kar lo
vo manen na manen ye marzi hai un ki magar un ko 'purnam' mana kar to dekho
