Welcome To Urdu Shayari

Jis simt bhi dekhooN nazar aata hai ke tum ho Ae jaan-e-jahaaN ye koi tum saa hai ke tum ho
Yeh khwaab hai, khushboo hai, ke jhoNka hai, ke pal hai Yeh dhuNd hai, baadal hai, ke saayaa hai, ke tum ho
Is deed ki sahAat main kaiye rang hain larzaaN Mein hooN ke koi aur hai duniya hai ke tum ho
DekhO yeh kisi aur ki aankhAin hain ke meri DekhooN yeh kisi aur ka chehra hai ke tum ho
Yeh umr-e-gurezaaN kahin tahre to yeh jaanooN Har saaNs main mujh ko yeh lag ta hai ke tum ho
Har bazm main mauzoo-e-suKhan dil zadgaaN ka Ab kaun hai Shireen hai ke Laila hai ke tum ho
Ik dard ka phaila huA sahara hai ke mein hooN Ik mauj main aaya huAa dariya hai ke tum ho
Woh waqt na aaiye ke dil-e-zaar bhi sochai Is shehar main tanha koi hum sa hai ke tum ho
Aabaad hum aashufta sarOn se nahin maqtal Yeh rasM abhi shehar main zinda hai ke tum ho
Ae jaan-e-‘Faraz’ itni bhi taufeeq kise thi Hum ko ghum-e-hasti bhi gawaara hai ke tum ho

Apni aawaaz ki larzish pe to qaaboo paalo
Pyaar ke bol to honton se nikal jate hain
apne tewar to sambhaalo ke koi ye na kahein
dil badalte hain to chehere bhi badal jate hain”
main nazar se pii rahaa huuN ye samaa badal na jaaye
na jhukaao tum nigaahe.n kahiin raat dhal na jaaye
mere ashk bhii hain is mein ye sharaab ubal na jaaye
meraa jaam chhuunevaale teraa haath jal na jaaye
merii zindagii ke maalik mere dil pe haath rakhanaa
tere aane kii khushii mein meraa dam nikal na jaaye
abhii raat kuchh hai baaqii na uthaa naqaab saaqii
teraa rind girate girate kahiin phir sambhal na jaaye
mujhe phuuNkane se pahale meraa dil nikaal lenaa
ye kisii kii hai amaanat kahiin saath jal na jaaye
main banaa to luuN nasheman kisii shaaKh-e-gulsitaaN pe
kahiin saath aashiyaan ke ye chaman bhii jal na jaaye
isi khauf se nasheman na bana saka main ‘Anwar’
ke nighaah-e-ahl-e-gulshan kahin phir badal na jaaye
Anwar Mirzapuri

zindagi jab bhi teri bazm mein, laati hai hamen
yeh zameen chaand se behtar, nazar aati hai hamen
surkh phoolon se mehek uthati hain dil ki rahen
din dhale yun teri aawaz bulaati hai hamen
yaad teri kabhi dastak kabhi sargoshii se
raat ke pichhale prahar roz jagaati hai hamen
har mulaqaat ka anjaam judai kyun hai
ab toh har waqt yeh hi baat sataati hai hamen
Shahryar

ye daulat bhi le lo, ye shoharat bhi le lo
bhale chhin lo mujhase meri javaani
magar mujhako lautaa do bachapan kaa saavan
wo kaagaz ki kashti, wo baarish kaa paani
muhalle ki sabase nishaani puraani
wo budhiyaa jise bachche kahate the naani
wo naani ki baaton mein pariyon kaa deraa
wo chahare ki jhuriryon mein sadiyon kaa pheraa
bhulaae nahin bhuul sakataa hai koi
wo chhoti si raaten wo lambi kahaani
kadi dhuup mein apane ghar se nikalanaa
wo chidiyaa wo bulabul wo titali pakadanaa
wo gudiyaa ki shaadi mein ladanaa jhagadanaa
wo jhuulon se giranaa wo gir ke sambhalanaa
wo pital ke chhallon ke pyaare se tohafe
wo tuuti hui chuudiyon ki nishaani
kabhi ret ke unche tilon pe jaanaa
gharaunde banaanaa banaake mitaanaa
wo maasuum chahat ki tasvir apani
wo kvaabon khilaunon ki jaagir apani
na duniyaa kaa gam thaa na rishton ke bandhan
badi khuubasuurat thi wo zindagaani

judaai ho ke milan har adaa hamaari hai
tumhaaraa shahar hai lekin fizaa hamaari hai
shikaayateN bhi kareN ham to kis zabaan se kareN
Khudaa banaayaa ham ne ye Khataa hamaari hai
hamaare jism ki uriyaanat pe mat haNsanaa
ke tum jo oRhe huye ho wo ridaa hamaari hai
hamaare saamane zebaa nahiiN Guroor tumheN
jahaaN pe baiThe ho tum wo jagaa hamaari hai
Manzar Bhopali

apni dhun mein rehtaa hun
mein bhi tere jaisaa hun
o pichhli rut ke saathi
ab ke baras main tanhaa hun
teri gali mein saaraa din
dukh ke kankar chunataa hun
mujh se aankh milaaye kaun
main teraa aa_inaa hun
meraa diyaa jalaaye kaun
main teraa Khaali kamraa hun
tu jivan ki bhari gali
main jangal kaa rastaa hun
apni lahar hai apnaa rog
dariyaa hun aur pyaasaa hun
aati rut mujhe royegi
jaati rut kaa jhonkaa hun

Aaina mujse meri pehli si surat mange
Mere apne meri hone ki nishani mange
Mein bhatakata hi raha dard ke viraane mein
Waqt likhta raha chehre pe har pal ka hishab
Meri shohrat meri diwangi ki nazar hui
Pee gayi mai ki botal mere geeto ki kitaab
Aaj lauta hoon tu hasne ki ada bhool gaya
Yeh shahar bhoola mujhe mein bhi ise bhool gaya
Mera funn phir muje bazaar mein le aaya hai
Yeh wo jagah ke jahan mehr-o-vafaa bikate hain
Baap bikate hain aur lakht-e-jigar bikate hain
Kokh bikti hain, dil bikate hain, sar bikate hain
Is badalti hui duniya ka khuda koi nahin
Saste daamo pe yahan roz khuda bikate hain
Har kharidaar ko bazaar mein bikataa paaya
Hum kya paayenge kisi ne yahaan kya paaya
Mere ehsaas mere phool kahin aur chale
Bol pujaa meri bachi kahin aur chale aur chale
Written By : Suraj Sanim
Singer : Talat Aziz , Jagjit Singh