Welcome To Urdu Shayari

hath Khaali hain tere shahar se jate jate
jaan hoti to meri jaan luTate jate
ab to har hath ka patthar hamen pahchanta hai
umr guzri hai tere shahr men aate jate
ab ke mayus hua yaron ko ruKHsat kar ke
ja rahe the to koi zaKHm lagate jate
rengne ki bhi ijazat nahin hum ko warna
hum jidhar jate nae phul khilate jate
main to jalte hue sahraon ka ek patthar tha
tum to dariya the meri pyas bujhate jate
mujhko rone ka saliqa bhi nahin hai shayad
log hanste hain mujhe dekh ke aate jate
humse pahle bhi musafir kai guzre honge
kam se kam rah ke patthar to haTate jate

der lagi aane men tumko shukr hai phir bhi aae to
aas ne dil ka sath na chhoDa waise hum ghabrae to
shafaq dhanak mahtab ghaTaen tare naghme bijli phool
is daman men kya kya kuchh hai daman hath men aae to
chahat ke badle men hum bech den apni marzi tak
koi mile to dil ka gahak koi hamen apnae to
suni-sunai baat nahin ye apne upar biti hai
phul nikalte hain sholon se chahat aag lagae to
jhuT hai sab tariKH hamesha apne ko dohraati hai
achchha mera KHwab-e-jawani thoDa sa dohrae to
nadani aur majburi men yaro kuchh to farq karo
ek bebas insan kare kya TuT ke dil aa jae to
Andaleeb Shadani

kitni pi kaise kaTi raat mujhe hosh nahi
raat ke saath gai baat mujhe hosh nahi
mujh ko ye bhi nahin maaluum ki jaana hai kahaN
thaam le koi meraa haath mujhe hosh nahi
aaNsuon aur sharaabon men guzar hai ab to
main ne kab dekhi thi barasaat mujhe hosh nahi
jaane kyaa TuTaa hai paimaana ki dil hai meraa
bikhare bikhare hain Khayaalaat mujhe hosh nahi

donon jahan teri mohabbat men haar ke
wo ja raha hai koi shab-e-gham guzar ke
viran hai mai-kada KHum o saghar udas hain
tum kya gae ki ruTh gae din bahaar ke
ek fursat-e-gunah mili wo bhi chaar din
dekhe hain humne hausle parwardigar ke
duniya ne teri yaad se begana kar diya
tujhse bhi dil-fareb hain gham rozgar ke
bhule se muskura to diye the wo aaj faiz
mat puchh walwale dil-e-na-karda-kar ke

dil-girafta hi sahi bazm saja li jae
yaad-e-jaanan se koi sham na Khaali jae
rafta rafta yahi zindan men badal jate hain
ab kisi shahr ki buniyaad na Dali jae
mushaf-e-ruKH hai kisi ka ki bayaz-e-hafiz
aise chehre se kabhi fal nikali jae
wo murawwat se mila hai to jhuka dun gardan
mere dushman ka koi war na Khaali jae
be-nawa shahr ka saya hai mere dil pe faraaz
kis tarah se meri aashufta-KHayali jae

ek pal men ek sadi ka maza humse puchhiye
do din ki zindagi ka maza humse puchhiye
bhule hain rafta rafta unhen muddaton men hum
qiston men KHud-kushi ka maza humse puchhiye
aaghaz-e-ashiqi ka maza aap jaaniye
anjam-e-ashiqi ka maza humse puchhiye
jalte diyon men jalte gharon jaisi zau kahan
sarkar raushni ka maza humse puchhiye
wo jaan hi gae ki hamen un se pyar hai
aankhon ki muKHbiri ka maza humse puchhiye
hansne ka shauq hum ko bhi tha aap ki tarah
hansiye magar hansi ka maza humse puchhiye
hum tauba kar ke mar gae be-maut ai KHumar
tauhin-e-mai-kashi ka maza humse puchhiye

jhuki jhuki si nazar be-qarar hai ki nahin
daba daba sa sahi dil men pyar hai ki nahin
tu apne dil ki jawan dhaDkanon ko gin ke bata
meri tarah tera dil be-qarar hai ki nahin
wo pal ki jis men mohabbat jawan hoti hai
us ek pal ka tujhe intizar hai ki nahin
tujhe bhi apne pe ye etibar hai ki nahin
teri umid pe Thukra raha hun duniya ko