Welcome To Urdu Shayari

Kaha tak jafa husn-waalon ki sahte
Jawaani jo rehti to phir ham na rahte
Zamana Bada shauq se sun raha tha
Ham hi so gaye dastaan kehte kehte
Nasheman na jalta nishaani to rehti
Hamara tha kya theek rahte na rahte
Meri nao is gham ke darya mein ‘Saqib’
Kinaare pe aa hi lagi behte behte
Saqib Lakhnawi

judaai ho ke milan har adaa hamaari hai
tumhaaraa shahar hai lekin fizaa hamaari hai
shikaayateN bhi kareN ham to kis zabaan se kareN
Khudaa banaayaa ham ne ye Khataa hamaari hai
hamaare jism ki uriyaanat pe mat haNsanaa
ke tum jo oRhe huye ho wo ridaa hamaari hai
hamaare saamane zebaa nahiiN Guroor tumheN
jahaaN pe baiThe ho tum wo jagaa hamaari hai
Manzar Bhopali

apni dhun mein rehtaa hun
mein bhi tere jaisaa hun
o pichhli rut ke saathi
ab ke baras main tanhaa hun
teri gali mein saaraa din
dukh ke kankar chunataa hun
mujh se aankh milaaye kaun
main teraa aa_inaa hun
meraa diyaa jalaaye kaun
main teraa Khaali kamraa hun
tu jivan ki bhari gali
main jangal kaa rastaa hun
apni lahar hai apnaa rog
dariyaa hun aur pyaasaa hun
aati rut mujhe royegi
jaati rut kaa jhonkaa hun

tum itnaa jo muskuraa rahe ho
kya Gham hai jis ko chhupaha rahe ho
aaNkhon men nami haNsi labon par
kya haal hai kya dikhaa rahe ho
ban jaayenge zahar pite pite
ye ashk jo pite jaa rahe ho
jin zaKhmon ko waqt bhar chalaa hai
tum kyon unhen chheDe jaa rahe ho
rekhaaon kaa khel hai muqaddar
rekhaaon se maat khaa rahe ho

Aaj ke daur men aiy dost ye manzar kyuN hai
zaKhm har sar pe har ik haath men patthar kyuN hai
jab haqiqat hai ke har zarre men tu rahtaa hai
phir zamin par kahin masjid kahin mandir kyuN hai
apnaa anjaam to maalum hai sab ko phir bhi
apani nazaron men har insaan sikandar kyuN hai
zindagi jine ke qaabil hi nahin ab "Faakir"
varnaa har aaNkh men ashkon kaa samandar kyuN hai
By : Sudarshan Faakir

aflak se aata hai nalon ka jawab aaKHir
karte hain KHitab aaKHir uThte hain hijab aaKHir
ahwal-e-mohabbat men kuchh farq nahin aisa
soz o tab o tab awwal soz o tab o tab aaKHir
main tujhko batata hun taqdir-e-umam kya hai
shamshir o sinan awwal taus o rabab aaKHir
mai-KHana-e-europe ke dastur nirale hain
late hain surur awwal dete hain sharab aaKHir
kya dabdaba-e-nadir kya shaukat-e-taimuri
ho jate hain sab daftar gharq-e-mai-e-nab aaKHir
KHalwat ki ghaDi guzri jalwat ki ghaDi aai
chhuTne ko hai bijli se aaghosh-e-sahab aaKHir
tha zabt bahut mushkil is sail-e-maani ka
kah Dale qalandar ne asrar-e-kitab aaKHir

kitni pi kaise kaTi raat mujhe hosh nahi
raat ke saath gai baat mujhe hosh nahi
mujh ko ye bhi nahin maaluum ki jaana hai kahaN
thaam le koi meraa haath mujhe hosh nahi
aaNsuon aur sharaabon men guzar hai ab to
main ne kab dekhi thi barasaat mujhe hosh nahi
jaane kyaa TuTaa hai paimaana ki dil hai meraa
bikhare bikhare hain Khayaalaat mujhe hosh nahi