Welcome To Urdu Shayari

hath Khaali hain tere shahar se jate jate
jaan hoti to meri jaan luTate jate
ab to har hath ka patthar hamen pahchanta hai
umr guzri hai tere shahr men aate jate
ab ke mayus hua yaron ko ruKHsat kar ke
ja rahe the to koi zaKHm lagate jate
rengne ki bhi ijazat nahin hum ko warna
hum jidhar jate nae phul khilate jate
main to jalte hue sahraon ka ek patthar tha
tum to dariya the meri pyas bujhate jate
mujhko rone ka saliqa bhi nahin hai shayad
log hanste hain mujhe dekh ke aate jate
humse pahle bhi musafir kai guzre honge
kam se kam rah ke patthar to haTate jate

dil-girafta hi sahi bazm saja li jae
yaad-e-jaanan se koi sham na Khaali jae
rafta rafta yahi zindan men badal jate hain
ab kisi shahr ki buniyaad na Dali jae
mushaf-e-ruKH hai kisi ka ki bayaz-e-hafiz
aise chehre se kabhi fal nikali jae
wo murawwat se mila hai to jhuka dun gardan
mere dushman ka koi war na Khaali jae
be-nawa shahr ka saya hai mere dil pe faraaz
kis tarah se meri aashufta-KHayali jae

duniya ke sitam yaad na apni hi wafa yaad
ab mujhko nahin kuchh bhi mohabbat ke siwa yaad
main shikwa ba-lab tha mujhe ye bhi na raha yaad
shayad ki mere bhulne wale ne kiya yaad
chheDa tha jise pahle-pahal teri nazar ne
ab tak hai wo ek naghma-e-be-saz-o-sada yaad
jab koi hasin hota hai sargarm-e-nawazish
us waqt wo kuchh aur bhi aate hain siwa yaad
kya jaaniye kya ho gaya arbab-e-junun ko
marne ki ada yaad na jine ki ada yaad
muddat hui ek hadsa-e-ishq ko lekin
ab tak hai tere dil ke dhaDakne ki sada yaad
han han tujhe kya kaam meri shiddat-e-gham se
han han nahin mujhko tere daman ki hawa yaad
main tark-e-rah-o-rasm-e-junun kar hi chuka tha
kyun aa gai aise men teri laghzish-e-pa yaad
kya lutf ki main apna pata aap bataun
kije koi bhuli hui KHas apni ada yaad

Abhi is taraf na nigah kar main ghazal ki palken sanwar lun
Mera lafz lafz ho aaina tujhe aaine men utar lun
main tamam din ka thaka hua tu tamam shab ka jaga hua
zara Thahar ja isi moD par tere sath sham guzar lun
agar aasman ki numaishon men mujhe bhi izn-e-qayam ho
to main motiyon ki dukan se teri baaliyan tere haar lun
kahin aur banT de shahr men kahin aur baKHsh de izzaten
mere pas hai mera aaina main kabhi na gard-o-ghubar lun
kai ajnabi teri rah men mere pas se yun guzar gae
jinhen dekh kar ye taDap hui tera nam le ke pukar lun

ye samundar hai kinare hi kinare jao
ishq har shaKHs ke bas ka nahin pyare jao
yun to maqtal men tamashai bahut aate hain
aao us waqt ki jis waqt pukare jao
dil ki bazi lage phir jaan ki bazi lag jae
ishq men haar ke baiTho nahin haare jao
kaam ban jae agar zulf-e-junun ban jae
is liye usko sanwaro ki sanware jao
koi rasta koi manzil ise dushwar nahin
jis jagah chaho mohabbat ke sahaare jao
hum to miTTi se ugaenge mohabbat ke gulab
tum agar toDne jate ho sitare jao
Dubna hoga agar Dubna taqdir men hai
chahe kashti pe raho chahe kinare jao
tum hi socho bhala ye shauq koi shauq hua
aaj unchai pe baiTho kal utare jao
maut se khel ke karte ho mohabbat aajiz
mujhko Dar hai kahin be-maut na mare jao
Kaleem Aajiz

jhuki jhuki si nazar be-qarar hai ki nahin
daba daba sa sahi dil men pyar hai ki nahin
tu apne dil ki jawan dhaDkanon ko gin ke bata
meri tarah tera dil be-qarar hai ki nahin
wo pal ki jis men mohabbat jawan hoti hai
us ek pal ka tujhe intizar hai ki nahin
tujhe bhi apne pe ye etibar hai ki nahin
teri umid pe Thukra raha hun duniya ko

ek pal men ek sadi ka maza humse puchhiye
do din ki zindagi ka maza humse puchhiye
bhule hain rafta rafta unhen muddaton men hum
qiston men KHud-kushi ka maza humse puchhiye
aaghaz-e-ashiqi ka maza aap jaaniye
anjam-e-ashiqi ka maza humse puchhiye
jalte diyon men jalte gharon jaisi zau kahan
sarkar raushni ka maza humse puchhiye
wo jaan hi gae ki hamen un se pyar hai
aankhon ki muKHbiri ka maza humse puchhiye
hansne ka shauq hum ko bhi tha aap ki tarah
hansiye magar hansi ka maza humse puchhiye
hum tauba kar ke mar gae be-maut ai KHumar
tauhin-e-mai-kashi ka maza humse puchhiye