Welcome To Urdu Shayari

aah ko chaahiye ik 'umr asar hone tak
kaun jeeta hai teree zulf ke sar hone tak ?
daam har mauj meiN hai halqa-e-sad_kaam-e-nahaNg
dekhaiN kya guzre hai qatre pe guhar hone tak
aashiqee sabr talab aur tamanna betaab
dil ka kya rang karooN KHoon-e-jigar hone tak ?
partav-e-khur se hai shabnam ko fana'a ki taaleem
maiN bhee hooN ik inaayat ki nazar hone tak
yak_nazar besh naheeN fursat-e-hastee GHaafil
garmi-e-bazm hai ik raqs-e-sharar hone tak
GHam-e-hastee ka 'Asad' kis'se ho juz marg ilaaz
shamma'a har rang meiN jaltee hai sahar hone tak

dil-e-naadaaN tujhe huaa kya hai ?
aaKHir is dard kee dawa kya hai
ham haiN mushtaaq aur woh bezaar
ya ilaahee ! yeh maajra kya hai ?
maiN bhee muNh meiN zabaan rakhta hooN
kaash ! poocho ki "muddaa kya hai" ?
jab ki tujh bin naheeN koee maujood
fir ye hangaama, 'ei KHuda ! kya hai
ye paree chehara log kaise haiN ?
GHamza-o-ishwa-o-'adaa kya hai ?
shikan-e-zulf-e-ambaree kyoN hai ?
nigah-e-chashm-e-soorma sa kya hai ?
sabza-o-gul kahaaN se aaye haiN ?
abr kya cheez hai, hawa kya hai ?
hamko unse wafa ki hai ummeed
jo naheeN jaante wafa kya hai
haaN bhala kar tera bhala hoga"
aur darvesh kee sada kya hai ?
jaan tum par nisaar karta hooN
maiN naheeN jaanata duaa kya hai
maiNe maana ki kuchch naheeN 'GHalib'
muft haath aaye to bura kya hai ?
Mirza Ghalib

hazaaroN KHwahishaiN 'eisee ke har KHwahish pe dam nikle
bohot nikle mere armaaN lekin fir bhee kam nikle
Dare kyooN mera qaatil kya rahega uskee gardan par
wo KHooN, jo chashm-e-tar se 'umr bhar yooN dam_ba_dam nikle
nikalna KHuld se aadam ka sunte aayaiN haiN lekin
bohot be_aabru hokar tere kooche se ham nikle
bharam khul jaaye zaalim tere qaamat ki daraazee ka
agar is turra-e-pur_pech-o-KHam ka pech-o-KHam nikle
magar likhwaaye koee usko KHat, to hamse likhawaaye
huee subah aur ghar se kaan par rakhkar qalam nikle
huee is daur meiN mansoob mujhse baada_aashaamee
fir aaya wo zamaana, jo jahaaN se jaam-e-jam nikle
huee jinse tavaqqo KHastagee kee daad paane kee
wo hamse bhee ziyaada KHasta-e-teGH-e-sitam nikle
mohabbat meiN naheeN hai farq jeene aur marne kaa
usee ko dekh kar jeete haiN jis kaafir pe dam nikle
zara kar jor seene par ki teer-e-pursitam nikle
jo wo nikle to dil nikle, jo dil nikle to dam nikle
KHuda ke waaste parda na kaabe se uThaa zaalim
kaheeN 'eisa na ho yaaN bhee wohee kaafir sanam nikle
kahaaN maiKHaane ka darwaaza 'GHalib' aur kahaaN waaiz
par itana jaante haiN kal wo jaata tha ke ham nikle
Mirza Ghalib

ye kyaa ke sab se bayaaN dil ki haalaten karni
'Faraz' tujh ko na aain muhabbaten karani
ye qurb kyaa hai ke tu saamne hai aur hamen
shumaar abhi se judaai ki sa'aten karani
koi Khuda ho ke patthar jise bhii ham chahen
tamaam umr usi ki ibaadaten karani
sab apne apne qarine se muntazir us ke
kisi ko shukr kisi ko shikaayaten karani
ham apne dil se hain majboor aur logon ko
zaraa sii baat pe barpaa qayaamaten karni
milen jab un se to mub-ham sii guftaguu karna
phir apne aap se sau-sau vazaahaten karani
ye log kaise magar dushmani nibhaaten hain
hamiin ko raas na aain muhabbaten karani
kabhii 'Faraz' naye mausamon men ro denaa
kabhii talaash puraanii raqaabaten karani
Ahmad Faraz

terii Khushbuu kaa pataa kartii hai
mujh pe ehasaan havaa kartii hai
shab kii tanhaa_ii men ab to aksar
guftaguu tujh se rahaa kartii hai
dil ko us raah pe chalanaa hii nahiin
jo mujhe tujh se judaa karatii hai
zindagii merii thii lekin ab to
tere kahane men rahaa kartii hai
us ne dekhaa hii nahiin varnaa ye aaNkh
dil kaa ehavaal kahaa kartii hai
beniyaaz-e-kaaf-e-dariyaa angusht
ret par naam likhaa kartii hai
shaam paDate hii kisii shaKhs kii yaad
kuuchaa-e-jaaN men sadaa kartii hai
mujh se bhii us kaa hai vaisaa hii suluuk
haal jo teraa ana??? kartii hai
dukh huaa karataa hai kuchh aur bayaaN
baat kuchh aur huaa kartii hai
abr barase to inaayat us kii
shaaKh to sirf duaa kartii hai
masalaa jab bhii uThaa chiraaGon kaa
faisalaa sirf havaa kartii hai
Parveen Shakir

koee din gar zindagaanee aur hai
apne jee meiN hamne THaanee aur hai
aatish-e-dozaKH meiN ye garmee kahaaN
soz-e-GHam haay nihaanee aur hai
baarha dekhee haiN unkee ranjishaiN
par kuchch ab ke sar_giraanee aur hai
deke KHat muNh dekhta hai naamabar
kuchch to paiGHaam-e-zabaanee aur hai
qaata-e-'amaar hai aksar nujoom
woh balaa-e-aasmaanee aur hai
ho chukeeN 'GHalib' balaayeN sab tamaam
ek marg-e-naagahaanee aur hai

baazeechaa-e-atfaal hai duniya mere aage
hota hai shab-o-roz tamaasha mere aage
ik khel hai auraNg-e-sulemaaN mere nazdeek
ik baat hai 'eijaz-e-maseeha mere aage
juz naam naheeN soorat-e-aalam mujhe manzoor
juz waham naheeN hastee-e-ashiya mere aage
hota hai nihaaN gard meiN sehara mere hote
ghisata hai jabeeN KHaak pe dariya mere aage
mat pooch ke kya haal hai mera tere peeche ?
too dekh ke kya rang tera mere aage
sach kahte ho, KHudbeen-o-KHud_aaraa na kyoN hooN ?
baiTha hai but-e-aainaa_seemaa mere aage
fir dekhiye andaaz-e-gul_afshaani-e-guftaar
rakh de koee paimaanaa-o-sahba mere aage
nafrat ka gumaaN guzare hai, maiN rashk se guzaraa
kyoN kar kahooN, lo naam na uska mere aage
imaaN mujhe roke hai jo khiNche hai mujhe kufr
ka'aba mere peeche hai kaleesa mere aage
aashiq hooN, pe maashooq_farebee hai mera kaam
majnooN ko bura kehti hai laila mere aage
KHush hote haiN par wasl meiN yoN mar naheeN jaate
aayee shab-e-hijaraaN ki tamanna mere aage
hai mauj_zan ik qulzum-e-KHooN, kaash, yahee ho
aata hai abhee dekhiye kya-kya mere aage
go haath ko jumbish naheeN aaNhoN meiN to dam hai
rehne do abhee saaGHar-o-meena mere aage
ham_pesha-o-ham_masharb-o-ham_raaz hai mera
'GHalib' ko bura kyoN kaho achchaa mere aage !
 Mirza Ghalib