Welcome To Urdu Shayari

Mujhe apne zabt pe naaz tha, sare bazm raat ye kya hua
Meri aankh kaise chhalak gayi mujhe ranj hai ye bura hua
Meri zindagi ke charagh ka ye andaaz koi nayaa nahin
Kabhi raushni, kabhi teergi, kabhi jalaa hua kabhi bujha hua
Mujhe raaste mein pada hua kisi badnaseeb ka khat mila
Kahin khoon-e-dil se likha hua, kahin aansuon se mita hua
Jo nazar bacha ke guzar gaye, mere saamne se abhi abhi
Ye mere sheher ke ke log the mere ghar se ghar mila hua
Mujhe humsafar bhi mila koi, to shikasta haal meri tarah
Kahin raaston ka lutaa hua kahin manzilon ka thaka hua
Mujhay is ka koi bhi haq nahin, ke main shareek-e-bazm-e-khaloos hoon
Na meray pass koi niqab hai, na kuch aasteen main chhupa hua
Mujhay ap kiyun na samajh sakay ye apnay dil se poochiye
Meri zindagi ki kitab ka warq warq hai khula huua

haath uThe hain magar lab pe duaa koi nahin
ki ibaadat bhi wo jis ki jazaa koi nahin
ye bhi waqt aana tha ab to gosh har aawaaz hai
aur mere barbaad-e-dil men sadaa koi nahin
aa ke ab taslim kar len tu nahin to main sahi
kaun maanegaa ke ham men bewafaa koi nahin
waqt ne wo Khaak uDai hai ke dil ke dasht se
qaafile guzre hain phir bhi naqsh-e-paa koi nahin
Khud ko yuN mahasur kar baiTha huN apni zaat men
manzilen chaaron taraf hai raastaa koi nahin
kaise raaston se chale aur kis jagah pahuNche 'Faraz'
yaa hujum-e-dostaaN tha saath yaa koi nahin

dost ban kar bhi nahin saath nibhaanewaala
wahi andaaz hai zaalim ka zamaanewaala
ab ise log samajhte hain giraftaar meraa
saKht nadim hai mujhe daam men laanewaala
kya kahen kitne maraasim the hamaare is se
wo jo ik shaKhs hai muNh pher ke jaanewaala
tere hote hue aa jaati thi saari duniyaa
aaj tanhaa huN to koi nahin aanewaala
muntazir kis kaa huN TooTi hui dahliz pe main
kaun aayega yahaaN kaun hai aanewaala
main ne dekha hai bahaaron men chaman ko jalte
hai koi Khwaab ki taabir bataanewaala
kya Khabar thi jo meri jaan men ghula hai itna
hai wahi mujh ko sar-e-daar bhi laane vaala
tum takalluf ko bhi iKhlaas samajhte ho 'Faraz'
dost hota nahin har haath milaanewaala